Áhersla á að gangan sé allra

Mynd: RÚV / RÚV

Áhersla á að gangan sé allra

24.07.2018 - 12:00
Druslugangan verður haldin í áttunda skipti laugardaginn 28.júlí. Markmið göngunnar er eins og undanfarin ár að sporna gegn kynferðisofbeldi.

Eva Sigurðardóttir er í skipulagsteymi göngunnar sem í ár leggur sérstaka áherslu á að gangan sé allra. Þau vilja fá sem flesta til að taka þátt og vera meðvitaðir.

Eva segir metoo-byltinguna að sjálfsögðu hafa haft áhrif og hér á Íslandi hafi það verið sérstaklega sjokkerandi hve mikill fjöldi kvenna steig fram. „Þetta voru konur í öllum starfsstéttum og úti um allt. Allar konur hafa lent í einhverju.“

Á þeim átta árum sem hafa liðið frá því að druslugangan var fyrst haldin segir Eva ýmislegt hafa breyst. Augljósust er breytingin á samfélaginu og viðhorfum fólks í samfélaginu. „Það er auðveldara að segja frá og fólk fær þann stuðning sem það þarf.“ Enn er þó ýmislegt sem mætti bæta. Í því sambandi nefnir Eva réttarvörslukerfið og verkferla sem fylgt er ef þolandi ákveður að kæra.

Mynd með færslu
 Mynd: Grímur Jón Sigurðsson - RÚV

Í ár verður boðið upp á dagskrá alla vikuna. Í kvöld, fimmtudagskvöld og á föstudagskvöld verða umræðukvöld þar sem boðið verður upp á vettvang fyrir umræðu og spjall um þessi málefni. Fulltrúar frá Stígamótum, Bjarkarhlíð, Tabú og konur af erlendum uppruna eru meðal þeirra sem flytja erindi á kvöldunum.

Gangan sjálf hefst fyrir utan Hallgrímskirkju á slaginu 14 næstkomandi laugardag. Gengið verður niður Skólavörðustíg og Bankastræti og endað á Austurvelli. Hægt er að nálgast allar upplýsingar um Druslugönguna á Facebook. 

Eva var gestur í Núllinu og hægt er að hlusta á viðtalið í heild sinni í spilaranum hér fyrir ofan.