Athugið þessi frétt er meira en mánaðargömul.

Ætla að halda hvölunum rökum með dælum

02.08.2019 - 22:19
Mynd með færslu
Um 50 grindhvalir strönduðu við Útskálakirkju í Garði um verslunarmannahelgina. Um 30 þeirra komust aftur á haf út en 20 dýr drápust í fjörunni. Mynd: Víkurfréttir - Hilmar Bragi
Mynd með færslu
 Mynd: Víkurfréttir - Hilmar Bragi
Mynd með færslu
 Mynd: Víkurfréttir - Hilmar Bragi
Björgunarsveitir á Suðurnesjum og af höfuðborgarsvæðinu voru kallaðar út á tiunda tímanum í kvöld að beiðni lögreglunnar vegna grindhvala sem eru strandaðir í fjörunni við Útskálakirkju í Garði. Ekki er vitað nákvæmlega hversu margir hvalirnir eru en þeir gætu verið milli fimmtíu og sextíu. Enn er óljóst hversu umfangsmiklar aðgerðir þetta verða en miðað við myndir eru þó nokkuð margir hvalir komnir á þurrt.

Davið Már Bjarnason, upplýsingafulltrúi Landsbjargar, segir í samtali við fréttastofu að fyrstu menn séu komnir á staðinn og von sé á bátum frá Reykjavík. Verkefnið sé að verða sér úti um dælur og einhver klæði til að halda dýrunum rökum þannig að þau geti komist út af sjálfsdáðum. „Menn ætla að reyna leggja sig fram við að reyna að bjarga hvölunum.“ Hann segir að björgunarsveitir séu ekki að fara draga dýrin út.

Varðstjóri hjá lögreglunni á Suðurnesjum segir að lögreglan sé á vettvangi að reyna að bjarga einhverjum af dýrunum en þetta sé erfitt verkefni og ljóst að einhver dýranna muni deyja.

Víkurfréttir voru á staðnum fyrr í kvöld og birtu þetta myndskeið á Facebook síðu sinni. Hilmar Bragi Bárðarson, fréttamaður og ljósmyndari hjá Víkurfréttum, sagði í samtali við fréttastouf það fjari fljótt undan dýrunum. Heimamenn hafi verið komnir á undirfötin til að reyna koma dýrunum til bjargar.

Ekki er langt síðan fimmtíu grindhvalir strönduðu á Gömlu eyri á Löngufjórum á sunnanverðu Snæfellsnesi. Myndirnar af hvölunum sem lágu dauðir í fjörunni vöktu mikla athygli . Edda Elísabet Magnúsdóttir, sjávarlíffræðingur, sagði þá í samtali við fréttastofu að fjölmargar ástæður gætu verið fyrir því að hvalir villist in á háskaleg svæði. Grindhvalir væru hópdýr með sterk félagslegstengsl sem yfirgæfu félaga sína ekki svo glatt.

 

freyrgigja's picture
Freyr Gígja Gunnarsson
Fréttastofa RÚV