„Ábyrgðin í svona málum liggur hjá fyrirtækinu sjálfu“

13.11.2019 - 12:06
Mynd: Eddi / RÚV
„Það ber aldrei einn ábyrgð í svona stöðu. Það bara liggur í hlutarins eðli. Ábyrgðin í svona málum liggur hjá fyrirtækinu sjálfu. Það gefur alveg augaleið. Það er fyrirtækið sjálft sem þarf að svara fyrir þær ásakanir sem bornar eru upp,“ segir Kristján Þór Júlíusson, sjávarútvegs- og landbúnaðarráðherra. Hann segir að málið geti haft áhrif á trúverðugleika sinn sem ráðherra. 

Kristján Þór segir Kveiksþáttinn í gær, þar sem fjallað er um greiðslur Samherja til stjórnmálamanna og hátt settra embættismanna I Namibíu hafa verið mjög sláandi. Hann segir það vera klárt mál að þessar upplýsingar skaði íslenskan sjávarútveg. Mikilvægt sé að málið verði rannsakað. 

„Ég hef ekki haft afskipti af þessu fyrirtæki, rekstri eða öðru, frá því að ég hætti í stjórn fyrir tæpum tveimur áratugum; nítján árum. En auðvitað hefur maður taugar til fyrirtækisins og starfseminnar fyrir norðan. Eðlilega, þetta er stór partur af  norðlensku samfélagi,“ segir Kristján. 

Í þættinum í gær kom fram að Kristján hefði hitt háttsetta menn sem fengu greiðslur frá Samherja. „Eins og heimildarmaður þáttarins hefur lýst að þá fyrir rúmum fimm árum rek ég þarna inn nefið og heilsa þessum mönnum og á við þá spjall um daginn og veginn en grundvallaratriði í þessum málum fyrir mig er að ég hef engin afskipti af þessu eða upplýsingar um viðskipti eða neitt því um líkt og þar af leiðandi hef ég ekkert að fela í þessum efnum,“ sagði Kristján. Hann segir það algjöra tilviljun að hann hafi verið á skrifstofu Samherja á sama tíma og þessir menn. 

„Þannig hittist bara á í þessu tilfelli að ég á persónulegan fund með einstaklingi sem ég hef þekkt í langan tíma um allt önnur mál að þá rekst ég á þessa einstaklinga,“ sagði Kristján og þvertók á sama tíma fyrir það að hafa verið boðaður til fundar á skrifstofunni á þessum tíma. Hann segist ekkert hafa heyrt af viðskiptunum sem fjallað er um I þættinum fyrr en hann fékk upplýsingabeiðni frá Stundinni í síðustu viku. 

Kristján segist hafa heyrt í nokkrum starfsmönnum Samherja undanfarna daga. Meðal annars Þorsteini Má Baldvinsyni forstjóra. „Ég var bara að spyrja hvernig honum liði einfaldlega,“ sagði Kristján. Hann segir að Samherjamenn verði að svara því sjálfir hvað átt var við þegar fram kom að þeir hefðu sagt að Kristján væri þeirra maður.

„Því verða þeir að svara sjálfir. Ég hef hingað til bara litið á mig sem minn eigin og minnar fjölskyldu og er þekktur fyrir flest annað en að vera mjög undanlátssamur. Ég hef nú frekar orð á mér fyrir að vera frekar stífur í framgöngu,“ sagði Kristján.

sigridurda's picture
Sigríður Dögg Auðunsdóttir
Jón Hákon Halldórsson
Fréttastofa RÚV
Síðast:
Þessi þáttur er í hlaðvarpi