5.600 heimili og vinnustaðir án rafmagns í dag

14.02.2020 - 22:34
Mynd með færslu
 Mynd:
5.600 heimili og vinnustaðir urðu rafmagnslaus á svæði RARIK í óveðrinu í dag, flestir á Suðurlandi og Suðausturlandi. Rúmlega 100 staurar brotnuðu og eitthvað um vírslit og sláarbrot. Þetta kemur fram í tilkynningu á vef RARIK.

Einn bær í Hvalfirði á Vesturlandi er rafmagnslaus og viðgerð bíður morguns. 

Í tilkynningu frá RARIK kemur einnig fram að bilanir séu á tíu stöðum á Suðurlandi. Rafmagnslaust sé á nokkrum bæjum undir Eyjafjöllum, í Vík og í Mýrdal. Rafmagni sé skammtað í Vík og eru íbúar beðnir um að spara rafmagn.

Þá er rafmagnslaust frá Laugarvatni að Laugardalshólum, á nokkrum bæjum í Landeyjum, innsta hluta Fljótshlíðar og inn í Þórsmörk.

Línan milli Kirkjubæjarklausturs og Víkur er úti og þar með er rafmagnslaust í Álftaveri, Meðallandi og hluta Skaftártungna. Aðstæður á Suðurlandi eru ágætar og unnið er að viðgerðum, segir í tilkynningunni.

Gert er ráð fyrir að langflestir verði komnir með rafmagn í kvöld eða í nótt, annað hvort eftir viðgerð eða með varaaflsstöðum.

Á Austurlandi er búið er að koma á rafmagni í sveitarfélaginu Hornafirði. Á Vopnafirði er rafmagnslaust í Vesturárdal að hluta og út ströndina í Vopnafirði. 

Á Norðurlandi er enginn rafmagnslaus svo vitað sé, segir í tilkynningunni.