Athugið þessi frétt er meira en 2 ára gömul.

400 milljónir í endurbætur hjúkrunarheimila

Mynd með færslu
 Mynd: Heilbrigðisráðuneytið
Svandís Svavarsdóttir heilbrigðisráðherra hefur úthlutað rúmum 400 milljónum króna úr Framkvæmdasjóði aldraðra til uppbyggingar og endurbóta á hjúkrunarheimilum um land allt.

Þetta kemur fram í tilkynningu frá heilbrigðisráðuneytinu, þar er einnig að finna yfirlit yfir úthlutunina. 

„Það er kraftur í uppbyggingu þessarar mikilvægu þjónustu við aldraða. Miklar endurbætur hafa átt sér stað á síðustu misserum sem bæta aðbúnað og aðstæður fólks sem ekki er fært um að búa lengur heima, samhliða nýframkvæmdum. Þá er ekki síður mikilvæg sú uppbygging sem felst í fjölgun dagdvalarrýma, því í þeim felst þjónusta sem tvímælalaust lengir möguleika aldraðra til að búa heima þótt þeir þurfi mikinn stuðning. Og það er jú það sem flestir vilja allra helst“ segir heilbrigðisráðherra.

Stærstu einstöku úthlutuninni er ráðstafað til viðbyggingar eldhúss Hrafnistu og endurnýjun búnaðar þar. Þar stendur til að framleiða mat fyrir íbúa allra Hrafnistuheimilana, segir í tilkynningunni. Þá renna framlög til endurnýjunar búnaðar í eldhúsum Eirar og Öldrunarheimilum Akureyrar. Samanlagt eru þetta tæpar 200 milljónir króna. 

Tæpar 70 milljónir króna fara í framkvæmdir sem snúa að breytingu á fjölbýli í einbýli með snyrtingu. 

Þá stendur til að fjölga dagdvalarrýmum og bæta aðstöðu á Sólvangi í Hafnarfirði. Einnig eru fyrirhugaðar breytingar á hjúkrunardeild í dagdeild fyrir heilabilaða á Hrafnistu. Samanlagt gera þetta tæpar 50 milljónir króna. 

Að öðru leyti er um lægri fjárhæðir að ræða sem renna til smærri viðhaldsverkefna og endurbóta.