Mynd: EPA
Athugið þessi frétt er meira en 5 ára gömul.
323 hreindýr drápust í þrumuveðri
Norskir dýralæknar rannsaka nú hvort hreindýr sem drápust á Harðangursheiði á Þelamörk fyrir helgi kunni að hafa verið sýkt af riðu. Líklegast er þó talið að eldingar hafi orðið dýrunum að aldurtila en mikið þrumuveður gekk yfir svæðið í lok nýliðinnar viku.
Veiðieftirlitsmenn fundu á föstudag hræ af 323 dýrum, þar af sextíu kálfum, á bletti sem er 50-80 metrar í þvermál. Aðrar skýringar, til dæmis riðuveiki, eru þó taldar hugsanlegar og því hafa dýralæknar tekið sýni úr hræjunum, að því er fram kemur í frétt norska ríkisútvarpsins um málið.
Hreindýradauðinn hefur vakið heimsathygli enda fá dæmi um að eldingar felli svo stóra dýrahjörð.
Harðangursheiði er eitt stærsta búsvæði villtra hreindýra í Noregi og þótt víðar væri leitað. Talið er að þar hafist við allt að 15.000 dýr.
