Svisslendingar voru heillum horfnir og Portúgal gekk á lagið. Ramos, sem hafði einungis leikið níu mínútur á mótinu þar til í dag, bætti við sínu öðru mark með snyrtilegri afgreiðslu. Þeir voru þó langt því frá hættir en vinstri bakvörðurinn Raphael Guerrreiro skoraði fjórða mark þeirra eftir glæsilega sókn.

Ramos var þó hvergi nærri hættur en á 64. mínútu hafði hann fullkomnað þrennu sína, og mörkin voru hvert öðru glæsilegra. Það sem meira er, Cristiano Ronaldo mun ekki eiga greiða leið aftur í byrjunarlið portúgalska liðsins. 

Flest allir í portúgalska liðinu áttu afbragðs leik en Joao Felix og Bruno Fernandes mega einnig leggjast sáttir á koddann eftir dagsverk sitt.

Á 72. mínútu kom Ronaldo in á fyrir Ramos. Fékk hann fyrirliðabandið og gífurleg fagnaðarlæti brutust út á vellinum. Þá fóru Otávio og Joao Felix einnig út af Ricardo Horta og Vitinha komu inn á. Ronaldo skoraði en var þó langt fyrir innan og markið því dæmt af.

Það var að lokum varamaðurinn Rafael Leao sem að skoraði sjötta mark Portúgala í leiknum. Ótrúleg frammistaða þar sem þeir fóru virkilega illa með lið Sviss, sem er jafnan nokkuð heilsteypt. Þeir hafa þó lokið leik.

Portúgal mætir hins vegar Marokkó í 8 liða úrslitum á laugardaginn kemur. Marokkómenn höfðu betur gegn Spánverjum eftir vítaspyrnukeppni fyrr í dag.