Athugið þessi frétt er meira en 2 mánaða gömul.

Brasilía einfaldlega of stórir fyrir Suður-Kóreu

epa10350523 Lucas Paqueta of Brazil celebrates scoring the 4-0 goal with his teammates during the FIFA World Cup 2022 round of 16 soccer match between Brazil and South Korea at Stadium 974 in Doha, Qatar, 05 December 2022. EPA-EFE/Noushad Thekkayil
 Mynd: EPA-EFE - EPA

Brasilía einfaldlega of stórir fyrir Suður-Kóreu

05.12.2022 - 21:04
Seinni leikur dagsins var viðureign Brasilíu og Suður-Kóreu. Brasilía bauð upp á sýningu í þessum leik en liðið skoraði fjögur mörk í fyrri hálfleik. Brasilía var einfaldlega allt of stór biti fyrir Suður Kóreu hér í dag í leik er Brasilía vann 4-1 og kemst þar með örugglega áfram í átta liða úrslitin þar sem þeir mæta Króatíu föstudaginn 9. desember kl. 15:00.

Brasilía bauð upp á kennslustund í fótbolta í fyrri hálfleik

Leikurinn var varla byrjaður er Brasilía skoraði fyrsta mark leiksins en á 6. mínútu skaust Neymar fram hægri kantinn og gaf boltann inn í teig Suður-Kóreu. Þar endaði boltinn hjá Vinicius Jr. er stillti honum bara þægilega upp, skaut og skoraði framhjá markverði Suður-Kóreu.

Suður-Kórea var bara enn að jafna sig á þessu marki þegar Brasilía komst í sókn og Vinicius Jr. reyndi sendingu á Richarlison inn í teiginn en leikmaður Suður-Kóreu komst inn í sendinguna. Richarlison tók á rás til að ná boltanum og var sparkaður niður inn í teignum. Vítaspyrna var dæmt.

Neymar steig á vítapunktinn og markvörður Suður-Kóreu tók dansinn á marklínunni til að trufla skot hans. Sú danssýning virkaði alls ekki en þess í stað tóku Brasilíumenn danssýningu á endalínunni eftir að Neymar setti boltann örugglega í netið hjá Suður-Kóreu, staðan orðinn 2-0 og rétt um tíu mínútur búnar af leiknum.

Suður-Kóreu menn reyndu að setja smá kraft í spil sitt til að reyna eitthvað til að stoppa þá sýningu sem Brasilíumenn voru klárlega með í uppsiglingu og áttu eitt gott færi. Þá vildi Alison vera með í leiknum og átti virkilega góða markvörslu á 16. mínútu eftir gott skot af löngu færi.

Brasilíumenn voru mættir í þennan leik til að vinna og setja upp smá sýningu í leiðinni. Þriðja mark þeirra kom eftir stórkostlega spilamennsku liðsins á 28. mínútu er endaði með því að Richarlison skoraði þriðja markið.

Brasilíumenn dönsuðu eftir hvert mark á hliðarlínunni og allir tóku þátt, varamenn, þjálfarar og annað starfsfólk. Brasilía var ekki hætt að dansa því að fjórða markið í fyrri hálfleik kom á 35. mínútu er Lucas Paqueta skoraði eftir annað stórkostlegt samspil leikmanna Brasilíu í skyndisókn upp miðju vallarins.

Brasilíumenn áttu nokkur önnur mjög góð færi í þessum fyrri hálfleik en þessi grein yrði einfaldlega of löng ef það ætti að setja þau öll inn. 

Brasilíumenn saddir eftir markasúpuna í fyrri hálfleik

Alveg ljóst að Suður-Kórea yrði að gera eitthvað ef stoppa ætti þessa danssýningu sem Brasilía setti upp í fyrri hálfleik. Son komst í gott færi á 46. mínútu er Alison náði að verja með öxlinni.

Raphinha komst í gott færi á 61. mínútu er hann var einn á móti markverði sem gerði vel og varði.

Suður-Kórea þurfti að sýna sínar allra, allra bestu hliðar ef þeir ætluðu að fá eitthvað úr þessum leik annað en kennslustund í knattspyrnu. Á 62. mínútu þurfti Alison sannarlega að vinna fyrir laununum sínum er hann átti góða markvörslu eftir harða sókn Suður-Kóreu.

Það kom að því að sóknir Suður-Kóreumanna næðu að enda með marki. Liðið fékk aukaspyrnu á 75. mínútu og endaði boltinn fyrir framan fæturnar á Seung-Ho Paik er tók góða spyrnu í átt að marki sem var óverjandi fyrir Alison í marki Brasilíu. 

Þessum fjöruga leik lauk með sigri Brasilíumanna 4-1 er halda nú í átta liða úrslitin og taka þar á móti Króatíu föstudaginn 9. desember kl. 15:00

 

 

Efstaleiti 1, 150 Reykjavík   ·   Sími: 515-3000   ·   [email protected]    ·   © RÚV