Athugið þessi frétt er meira en 2 mánaða gömul.

England tryggði sér farseðil í 8-liða úrslit með sigri

epa10348798 Bukayo Saka (C) of England celebrates with teammates after scoring the 3-0 lead during the FIFA World Cup 2022 round of 16 soccer match between England and Senegal at Al Bayt Stadium in Al Khor, Qatar, 04 December 2022. EPA-EFE/Neil Hall
 Mynd: EPA-EFE - EPA

England tryggði sér farseðil í 8-liða úrslit með sigri

04.12.2022 - 20:59
Seinni leikur dagsins var viðureign Englands og Senegal en England vann B-riðlinn á meðan Senegal varð í öðru sæti A-riðils. Leikurinn í dag var mikil skemmtun þar sem England var með yfirburði og vann 3-0 sigur. England mætir heimsmeisturum Frakka laugardaginn 10. desember í átta liða úrslitum mótsins.

Fyrir leikinn

England varð heimsmeistari 1966 en síðan hefur liðið tvisvar sinnum náð inn í undanúrslitaleiki HM, fyrra skiptið 1990 og svo nú síðast í Rússlandi 2018. Í Rússlandi tapaði liðið fyrir Króatíu sem svo varð að lúta í lægra haldi fyrir Frakklandi í úrslitaleiknum. Englendingar hafa alls tíu sinnum náð inn í átta liða úrslit keppninnar í sinni sögu.

Síðan Senegal kom fyrst inn á HM 2002 hefur liðið upplifað allan tilfinningaskalann á mótinu. Þeir byrjuðu þátttöku sína á því móti með glimrandi sigri á Frökkum 1-0 en liðið komst í átta liða úrslitin það ár. Senegal náði ekki inn á HM 2006,2010 og 2014 og 2018 komst það ekki upp úr riðlakeppninni. Senegal varð í öðru sæti A-riðils á eftir liði Hollands sem þeir töpuðu fyrir 0-2 en þeir unnu Katar 3-1 og einnig Ekvador 2-1. 

England og Senegal hafa aldrei áður mæst í keppnisleik fyrr en nú.

Fyrri hálfleikur 

Þjálfari Englendinga Gareth Southgate gerði eina breytingu á liði sínu frá sigrinum á Wales í lokaleik riðlakeppninnar en Saka kom inn á í stað Marcus Rashford. Þjálfari Senegal gerði tvær breytingar á sínu liði en Mendy og Diatta komu inn í stað Papa Gueye og Gana Gueye.

England var mun meira með boltann í upphafi leiks en báðum liðum tókst að komast í góð færi en inn vildi boltinn ekki.

Senegal átti dauðafæri í leiknum á 22. mínútu er varnarmenn Englands gerðust sekir um slæm mistök. Ismaila Sarr átti gott skot er fór yfir mark Englendinga en Senegal vildi fá dæmda hendi á leikmann Englendinga en dómari leiksins hlustaði ekkert á það.

Senegal átti annað gott færi á 30. mínútu er Dia fær góða sendingu inn fyrir vörn Englands og á gott skot sem Pickford varði vel í marki Englands.

Það var svo á 37. mínútu er Jordan Henderson nær að skora fyrsta mark Englands er Jude Bellingham nær að senda á hann eftir gott hlaup upp vinstri kantinn.

Annað mark Englands kom svo rétt fyrir lok fyrri hálfleiks er Harry Kane skoraði sitt fyrsta mark á þessu HM eftir góða sendingu frá Phil Foden.

England tryggir sér sæti í átta liða úrslitum

Seinni hálfleikur byrjaði mjög vel fyrir England sem skoraði sitt þriðja mark á 57. mínútu er Saka fær góða sendingu frá Phil Foden.  Saka hér með sitt þriðja mark á þessu móti.

Fleiri mörk voru ekki skoruð í þessum leik og England tryggir sér sæti í 8-liða úrslitum þar sem þeir mæta heimsmeisturum Frakka laugardaginn 10. desember kl. 19:00

Efstaleiti 1, 150 Reykjavík   ·   Sími: 515-3000   ·   [email protected]    ·   © RÚV