Athugið þessi frétt er meira en 2 mánaða gömul.

Borgin veltir við hverjum steini til að spara milljarð

01.12.2022 - 18:22
Mynd með færslu
 Mynd: Ragnar Visage - RÚV
Meirihluti borgarráðs samþykkti í dag sparnaðar og hagræðingaraðgerðir sem eiga að skila rúmlega milljarði króna. Meðal þess sem grípa á til er að spara í innkaupum til leikskóla og stækka og breyta gjaldsvæði bílastæða.

 

Meirihlutinn segir í bókun sinni að þessi viðbrögð séu eðlileg og í samræmi við tilefni þar sem standa eigi vörð um framlínuþjónustu og viðkvæma hópa. 

Meðal þess sem lagt er til er að spara hundrað milljónir með því breyta innkaupum á matvælum í leikskólum. 

Segja á upp samningi um skólabúðir á Úlfljótsvatni og stytta opnunartíma í félagsmiðstöðvum unglinga um korter. Þeim verður lokað korter í tíu á kvöldin en ekki klukkan tíu. 

Endurskoða á gjaldskrá bílastæða í höfuðborginni. Það  þýðir með öðrum orðum að hækka á verðið í bílastæði borgarinnar. Borgaryfirvöld ætla sömuleiðis að ná í fimmtíu miljónir með því að stækka gjaldsvæði Bílastæðasjóðs.  

Borgin hyggst spara rúmar átta milljónir með því að fækka sýningum hjá Listasafni Reykjavíkur úr 19 í 17 og ekki fá jafn margir boðsmiða á opnanir. Stytta á opnunartíma í fimm söfnum þannig að þau verða opin til klukkan sex.  Tvö söfn fá að hafa opið til hálf sjö.

70 milljónir á að spara með því lækka aldursviðmið og minnka greiðsluþátttöku í hljóðfæranámi fullorðinna.  Þá ætlar borgin að draga úr og hætta nánast alfarið að senda frá sér bréfpóst og spara á nærri sextíu milljónir með því að breyta opnunartíma sundlauga á rauðum dögum. 

20 milljónir á að spara með því að draga úr viðhaldi gatnalýsingar vegna LED-lýsingar. Kolbrún Baldursdóttir, borgarfulltrúi Flokks fólksins,  gagnrýndi þetta og sagði í bókun að borgin mætti varla við þessu. Hún væri þegar dimm sem hefði áhrif á öryggi íbúa.

Starfsmenn borgarinnar fá ekki lengur frí bílastæði og stefnt er að því að skera niður kostnað við fundi borgarstjórnar um eina og hálfa milljón. 

 

freyrgigja's picture
Freyr Gígja Gunnarsson
Fréttastofa RÚV