Hugnast samstarf flestra flokka nema ysta hægrisins

Grænlenski þingmaðurinn Aaja Chemnitz, fulltrúi vinstriflokksins Inuit Atakatigitt Ataqatigiit systurflokks Vinstri grænna, nefnir þetta í samtali við fréttaskýringaþáttinn Deadline. 

Hún kveðst í sjálfu sér vilja ræða við alla flokka en kveðst ekki reiðubúin að styðja stjórn með Danmerkurdemókrata Ingerar Støjberg, Danska þjóðarflokkinn Dansk folkeparti og Nye Borgerlige innanborðs. 

Chemnitz kveðst lítast vel á hugmyndir Mette Frederiksen forsætisráðherra um ríkisstjórn þvert yfir miðju danskra stjórnmála.

Mikilvægast að gæta hagsmuna Grænlendinga

Mikilvægast segir hún að gæta hagsmuna Grænlendinga og lagði á dögunum fram tíu grundvallarkröfur þess efnis varðandi stjórnarmyndunarviðræður. „Ég hef ekki áhuga á hreinni, blárri ríkisstjórn,“ segir Chemnitz en hefur áður sagst áhugasöm um vinstri stjórn. 

Fjögur þingsæti á danska þinginu tilheyra Færeyjum og Grænlandi og þrjú þeirra féllu rauðu blokkinni í vil, bæði sætin Grænlendinga og annað Færeyinga.

Það tryggði rauðu blokkinni minnsta mögulega meirihluta á þinginu eða níutíu sæti. Þrír danskir stjórnmálaleiðtogar létu fljótlega hafa eftir sér hálfgerða vanþóknun á því að rauða blokkin hafði betur með fulltingi kjósenda á Norður-Atlantshafssvæðunum.

Það voru þeir Lars Løkke Rasmussen, leiðtogi Moderaterne, Søren Pape Poulsen leiðtogi Íhaldsmanna og Alex Vanopslagh, leiðtogi Frjálslynda bandalagsins.