Grænlendingar tryggðu rauðu blokkinni meirihluta

Öll atkvæði voru talin um miðnætti að íslenskum samkvæmt því sem fram kemur á vef danska ríkisútvarpsins. 

Skjótt skipast veður í lofti

Allt útlit var fyrir að Moderaterne, nýr flokkur Lars Lökke Rasmussen fyrrverandi forsætisráðherra yrði í lykilstöðu þegar kæmi að stjórnarmyndunarviðræðum. Flokkurinn fær sextán sæti og Bláa blokkin fær 72.

Rauða blokkin með Jafnaðarmannaflokk Mette Frederiksen í broddi fylkingar tryggði sér minnsta mögulega meirihluta eða níutíu þingsæti á elleftu stundu. Það náðist með tveimur þingmönnum Grænlands og einum frá Færeyjum.

Jafnaðarmenn eru jafnframt stærsti einstaki flokkurinn á þinginu, með fimmtíu þingmenn, tveimur fleiri en á seinasta kjörtímabili. Nokkur breyting varð á stöðu flokka innan rauðu blokkarinnar.

Jakob Elleman Jensen, formaður Venstre, stærsta stjórnarandstöðuflokks Danmerkur, kveðst taka fulla ábyrgð á bágu gengi flokksins sem tapaði heilum 19 þingsætum. Nýr flokkur hinnar umdeildu stjórnmálakonu Inger Støjberg fékk 14 þingmenn kjörna á danska þingið í gær.

Jafnaðarflokkurinn flokkur allra Dana

Eftir að Mette Frederiksen tókst að brjóta sér leið gegnum fagnandi mannfjöldann í Kristjánsborgarhöll hóf hún hálfklökk ræðu sína, og sagðist glöð og stolt enda hefði flokkurinn náð besta árangri í yfir tuttugu ár.

Jafnaðarflokkurinn væri flokkur allra Dana, hvort sem þeir byggju í sveit, bæ eða borg. Mette Frederiksen sagði því fylgja ábyrgð sem hún hlypi ekki undan en hún gengur á fund drottningar á morgun og skilar umboði núverandi stjórnar.

Frederiksen segir ljóst að ekki sé meirihluti að baki stjórnarinnar í núverandi mynd en hún kveðst vilja mynda stjórn með breiðri skírskotun yfir miðjuna, fái hún til þess umboð. 

Kosningaþátttaka í dönsku þingkosningunum var sú minnsta í yfir þrjátíu ár. Rétt rúm 84 af hundraði mættu á kjörstað eða hálfu prósentustigi minna en 2019.