Athugið þessi frétt er meira en 4 mánaða gömul.

Aðgerðum lögreglu vegna sprengjuhótunar lokið

Mynd: RÚV/Bragi / RÚV/Bragi
Aðgerðum lögreglu vegna sprengjuhótunar um borð í þotu bandaríska flutningafélagsins UPS, sem lenti á vellinum á tólfta tímanum í gærkvöld., er lokið. Sprengjusérfræðingar sérsveitar ríkislögreglustjóra fundu pakka með „torkennilegum hlutum“ um borð í vélinni, sem reyndust vera flugeldar og eftirlíkingar af skotvopnum.

Sprengjuhótunin barst klukkan tæplega ellefu í gærkvöld og var Keflavíkurflugvelli lokað í um það bil fjórar klukkustundir. Vélin sem er af gerðinni Boeing 747-8 var á leið frá Köln í Þýskalandi til Louisville í Kentucky í Bandaríkjunum, um 250 - 300 kílómetra vestsuðvestur af Reykjanesskaga, þegar hótunin barst. Vélin er fraktflugvél og því engir farþegar um borð. 

Keflavíkurflugvöllur var opnaður að nýju um klukkan þrjú í nótt. Að sögn Guðjóns Helgasonar, upplýsingafulltrúa Isavia, komst flugumferð í eðlilegt horf eftir að völlurinn var opnaður og flug í morgun verið samkvæmt áætlun.

Sigurður Hrafn segir óljóst hvenær störfum ljúki um borð í vélinni sem hefur verið dregin afsíðis á Keflavíkurflugvelli þar sem skoðunin fer fram. „Það er bara verið að vinna eftir ákveðnum verkferlum sem sprengjudeildin sér um og það eru svosem engin tímamörk á því. Það er bara farið eftir verkferlum.“

Geturðu eitthvað sagt mér hvers eðlis þessi sprengjuhótun var? „Nei ég get það ekki.“

Uppfært klukkan 08:47

Aðgerðum lögreglu vegna sprengjuhótunarinnar er lokið, að sögn lögreglustjórans á Suðurnesjum. 

Tilkynningin sem barst lögreglu var á þann veg að ákveðinn pakki sem var um borð í vélinni innihéldi sprengju. Sprengjusérfræðingar sérsveitar ríkislögreglustjóra og sprengjusérfræðinga Landhelgisgæslunnar fundu pakkann og tóku hann til skoðunar. Í ljós kom að hann innihélt „torkennilega hluti.“

Við nánari skoðun kom í ljós að í pakkanum voru flugeldar og eftirlíkingar af skotvopnum.

Í tilkynningu frá lögreglustjóranum segir að enginn hafi verið í hættu á meðan aðgerðum stóð og að verkefnið hafi gengið vel.

urduro's picture
Urður Örlygsdóttir
peturm's picture
Pétur Magnússon
Fréttastofa RÚV
oddurth's picture
Oddur Þórðarson
Fréttastofa RÚV