Aflýsa hættustigi vegna eldgoss og jarðhræringa

Mynd með færslu
 Mynd: Björn Steinbekk - Aðsent
Ríkislögreglustjóri, í samráði við lögreglustjórann á Suðurnesjum, hefur ákveðið að aflýsa hættustigi vegna eldgoss í Meradölum á Reykjanesskaga. Þá er jafnframt aflýst óvissustigi vegna jarðhræringa á Reykjanesskaga.

Tæpar þrjár vikur eru síðan síðast mældist virkni í gígunum í Meradölum, og enginn órói hefur tekið sig upp aftur. Enn er þó vel fylgst með svæðinu, til dæmis varðandi skjálftavirkni og landbreytingar.

„Búast má við innskotavirkni og jarðskjálftum á Reykjanesskaga á næstu misserum og er fólk því hvatt til þess að ganga vel frá innanstokksmunum til að koma í veg fyrir líkamsmeiðsl og tjón,“ segir í tilkynningu frá almannavörnum.

Þar er jafnframt tekið fram að landverðir séu komnir til starfa við gosstöðvarnar og hafa þeir eftirlit með umferð og umgengni fólks. Dregið verður úr viðveru lögreglu og björgunarsveita á svæðinu, en þau sinna áfram útköllum og hálparbeiðnum.

Þá er ítrekað að varhugavert sé að fara út á hraunið, en gígar og eldhraun njóta sérstakrar verndar samkvæmt ákvæðum náttúruverndarlaga.