Perla Sól áfram efst þegar keppni er hálfnuð

Mynd með færslu
 Mynd: Sigurður Elvar Þórólfsson - Golf.is

Perla Sól áfram efst þegar keppni er hálfnuð

05.08.2022 - 14:46
Perla Sól Sigurbrandsdóttir kylfingur úr Golfklúbbi Reykjavíkur er efst þegar kvennakeppni Íslandsmótsins í golfi er hálfnuð í Vestmannaeyjum. Perla Sól lék annan hringinn í dag á pari, rétt eins og í gær.

Perla er því samtals á parinu þegar tveimur hringjum er lokið af fjórum. Ólafía Þórunn Kristinsdóttir, einnig úr GR saxaði þó á forskot Perlu í dag. Ólafía lék hring dagsins kvenna best eða á einu höggi undir pari. Hún er nú í 2. sæti á þremur höggum yfir pari, þremur höggum á eftir Perlu Sól.

Berglind Björnsdóttir, GR er svo í 3. sæti á samtals sex yfir pari, Guðrún Brá Björgvinsdóttir, GK í 4. sæti á sjö yfir pari og Ragnhildur Kristinsdóttir, GR er í 5. sæti á átta höggum yfir pari. Stöðuna má skoða betur hér.

RÚV sýnir beint frá keppni á þriðja hring á morgun frá klukkan 15:00 og svo frá keppni á lokahringnum á sunnudag frá 14:30.