Fólk þarf að passa sig á gasi við eldgosið

05.08.2022 - 10:57
Fólk að skoða eldgosið í Meradölum
 Mynd: Grímur Jón Sigurðsson - RÚV
Það koma nokkrar gastegundir upp úr gígnum í Meradölum. Sumar þeirra eru óþægilegar fyrir fólk. Ef það er mikið af þeim geta þær verið hættulegar. Gunnar Guðmundsson er lungna-læknir. Hann segir að vond áhrif af þessum gastegundum séu aðallega tvenns konar.

Hættulegt ef er mikið gas

Sumar gastegundir valda óþægindum í augum og lungum. Til dæmis brennisteins-díoxíð. Það kemur mikið af því upp úr gígnum. Ef það er mikið af brennisteins-díoxíði í loftinu getur það verið hættulegt.

Ekki stoppa þar sem landið liggur lágt

Aðrar gastegundir sem koma í eldgosinu geta safnast saman þar sem landið liggur lágt, í dældir. Til dæmis kolmón-oxíð. Þá verður lágt súrefnis-gildi í loftinu þar. Það þýðir að það er ekki mikið súrefni í loftinu.

Það er mjög hættulegt ef maður fær ekki nóg súrefni úr loftinu. Þess vegna á maður ekki að stoppa eða hvíla sig í dældum við eldgosið.

Börn og fóstur eru sérstaklega viðkvæm

Þetta getur verið sérstaklega vont fyrir börn. Börn eru viðkvæmari fyrir þessum gastegundum heldur en fullorðið fólk. Þess vegna ættu börn ekki að vera við eldgosið í Meradölum.  

Það getur líka verið vont fyrir óléttar konur að vera nálægt eldgosinu. Fóstur eru nefnilega mjög viðkvæm fyrir því ef það vantar súrefni í loftið. Fólk sem er með astma eða aðra sjúkdóma í lungum þarf líka að passa sig sérstaklega. 

 

Atli Sigþórsson
málfarsráðunautur