Athugið þessi frétt er meira en 6 mánaða gömul.

Talið að um tíu þúsund séu við gosstöðvarnar

Mynd: Hólmfríður Dagný Friðjónsd / RÚV
Víðir Reynisson, yfirlögregluþjónn hjá Almannavörnum, varar fólk við því að fara illa búið að gosstöðvunum. Það séu um sautján kílómetra gönguleið og því sé það aðeins fyrir vant göngufólk. Almannavarnir biðluðu í dag til fólks að fresta ferðum að gosstöðvunum en engu að síður eru þar um tíu þúsund manns. Almannavarnir hafa sent skilaboð til þeirra sem eru á svæðinu og hvatt fólk til þess að fara sérstaklega varlega, og telja um tíu þúsund séu þar núna.

Umfjöllun fréttastofu RÚV um eldgosið í sjónvarpsfréttatíma kvöldsins má sjá í myndskeiðinu hér að ofan. 

„Við höfum áhyggjur af öllum þessum mannfjölda og vonum að fólk beiti nú skynseminni og sé vel útbúið og vant göngu, þetta er ekki fyrir fólk sem er ekki vant því að fara í fjallgöngur,“ segir Víðir. Svæðinu í kringum gosstöðvarnar var lokað nokkruð sinnum í fyrravetur þegar gasmengun var mikil og vindaspáin var óhagstæð. Víðir segist hafa skilning á því en fólk þurfi að fara varlega. „Björgunarsveitarmenn hafa verið þarna á svæðinu og reynt að ræða við fólk og benda þeim á sem ekki eru vel búnir að reyna að fara varlega en fólk vill fara og sjá þetta og maður hefur ákveðinn skilning á því en þetta er bara raunverulega erfið ganga núna.“