Berjadagar og hátíð fjórðu helgina í röð á Siglufirði

Mynd með færslu
 Mynd: Vefur Síldarminjasafnsins - RÚV

Berjadagar og hátíð fjórðu helgina í röð á Siglufirði

29.07.2022 - 12:31

Höfundar

Búast má við miklum straumi fólks til Fjallabyggðar um helgina þar sem tvær bæjarhátíðir fara fram í nágrannabæjunum Ólafsfirði og Siglufirði.

Kynna tónlist í víðum skilningi á Berjadögum

Nú í hádeginu verður fjölskylduvæna tónlistarhátíðin Berjadagar sett með tónleikum í Ólafsfjarðarkirkju. Ólöf Sigursveinsdóttir er listrænn stjórnandi hátíðarinnar. „Markmið hátíðarinnar er að kynna tónlist í víðum skilningi og skapa samveru gesta og flytjenda og vera í rauninni sterk menningarstoð á Norðurlandi í þessari flottu menningarflóru sem er hér,“ segir Ólöf

Flæði, skemmtilegheit, eftirvænting og gleði

Hún segir fjölbreytni hátíðarinnar mikla en þar verður flutt samtímatónlist, þjóðlög og leikið fjórhent á flygil, svo fátt eitt sé nefnt. Hátíðin hefur ekki verið haldin frá því árið 2019 vegna faraldursins og því segir Ólöf það hafa verið gleðilegt að vakna í morgun vitandi að nú væri loksins hægt að fagna tónlistinni á Berjadögum: „Þannig að við erum bara að tala um flæði og skemmtilegheit og eftirvæntingu og gleði sem er náttúrulega nauðsynleg í lífinu.“

Minnast gamalla og góðra tíma á Siglufirði

Nágrannarnir á Siglufirði hófu hátíðarhöldin á Síldarævintýrinu með götugrilli í gær. Daníel Pétur Baldursson, einn skipuleggjenda, segir hátíðina fara vel af stað, „Það er mikilvægt fyrir samfélagið að það sé eitthvað um að vera í bænum fyrir gesti og gangandi og minnast gamalla og góðra tíma,“ segir hann. Meðal þess sem er gert til að minnast síldartímans er að halda bryggjuball og síldarsöltun líkt og hér áður.

Þetta er bæjarhátíð á Siglufirði fjórðu helgina í röð, eru Siglfirðingar bara meira stemningsfólk en við hin eða hvernig stendur á þessu?

„Ja, þetta er allt saman ólíkar hátíðir og margar með mismunandi markhópa þannig að það er alltaf eitthvað fyrir alla á Sigló,“ segir Daníel.

Mynd með færslu
 Mynd: Síldarævintýrið á Siglufir?
Götugrill í rauða hverfinu á Siglufirði

Tengdar fréttir

Fjallabyggð

Hátíðirnar Húnavaka og Frjó hafnar

Mannlíf

Balkönsk hálssöngtækni og íslenskur rímnakveðskapur

Norðurland

Síðasta tunnan til Siglufjarðar eftir langt ferðalag