Athugið þessi frétt er meira en 3 mánaða gömul.

Þýskt flugfélag hefur áætlunarflug norður og austur

Mynd með færslu
 Mynd: ISAVIA - RÚV
Þýska flugfélagið Condor ætlar að hefja áætlunarflug til Akureyrar og Egilsstaða sumarið 2023. Þetta er í fyrsta sinn sem flugfélagið flýgur til Íslands.

Flogið verður frá maí og til loka október í hverri viku, bæði milli Frankfurt og Akureyrarflugvallar og Frankfurt og Egilsstaðaflugvallar. Ralf Teckentrup, framkvæmdastjóri Condor segir Ísland vera einn af vinsælustu áfangstöðunum í norðri.

„Með tengingu til Akureyrar og Egilsstaða erum við að bregðast við eftirspurn frá fjölmörgum ferðaþjónustuaðilum sem bjóða upp á ferðir á Norður- og Austurlandi,“  segir Teckentrup í fréttatilkynningu. 

Flugfélagið er ekki það eina sem flýgur frá Akureyrarflugvelli en Nice Air og Transavia bjóða einnig upp á flug þaðan. 

Sigrún Björk Jakobsdóttir, framkvæmdastjóri Isavia Innanlandsflugvalla, segir þessa ákvörðun Condor vera afrakstur öflugs kynningarstarfs Austurbrúar, Isavia Innanlandsflugvalla, Íslandsstofu og Markaðsstofu Norðurlands. „Það er afar ánægjulegt að flugfélagið Condor hafi  ákveði að velja Akureyri og Egilsstaði sem fyrstu áfangastaði sína á Íslandi,“ segir Sigrún. 

Flugfélagið Condor hefur verið starfrækt í rúm 66 ár. Það flýgur með ríflega níu milljón farþega árlega frá stærstu flugvöllum í Þýskalandi, Sviss og Austurríki til um 90 áfangastaða víðsvegar um Evrópu, Bandaríkin og Afríku. 

ingibjorgsg's picture
Ingibjörg Sara Guðmundsdóttir
Fréttastofa RÚV