Athugið þessi frétt er meira en 5 mánaða gömul.

Riðusjúkdómar í mönnum og dýrum

12.07.2022 - 08:02
Mynd með færslu
 Mynd: Sölvi Andrason - RÚV
Riðuþolinn sauðfjárstofn verður ræktaður, er fyrirsögn fréttaskýringar í nýjasta tölublaði Bændablaðsins. Nú hefur verið staðfest að nærri 130 íslenskar kindur beri ákveðnar arfgerðir, eru þannig gerðar í genunum, að þær eru líklega verndaðar gegn riðu. Nú á að rækta íslenskan sauðfjárstofn sem er ónæmur gagnvart riðu og gera það hratt. Í Þetta helst er skoðað hvað er fram undan í riðufrírri sauðfjárrækt, skoða tengsl - eða ekki tengsl - riðu í sauðfé og svo riðu í mönnum.

Bretland er líklega það land sem hefur farið hvað verst úti þegar kemur að mannariðu, en við virðumst hafa sloppið nokkuð vel hingað til. En hvað er riða, hvernig lýsir hún sér, og hvað gerir sjúkdómurinn þegar hann hefur tekið sér bólfestu í dýrum - eða fólki? Hér á eftir verður meðal annars stuðst við Bændablaðið og hinn alvitra Vísindavef Háskóla Íslands. 

Einkenni riðusjúkdóma í fólki eru skjálfti og doði í útlimum, sjónskerðing, minnisleysi, persónuleikabreytingar, taugaveiklun, taugakippir, hláturrokur, vitglöp, lömun og á endanum dauði. Kindariða er langvinnur, banvænn og ólæknandi smitsjúkdómur í sauðfé sem veldur hrörnun í heila og mænu. Veikin leiðir kindina stundum til dauða á nokkrum vikum. Einkenni eru meðal annars kláði, taugaveiklun, skjálfti og lömun.