Athugið þessi frétt er meira en 1 mánaða gömul.

Telur að hvalveiðar leggist af vegna nýrra reglna

Mynd með færslu
 Mynd: RÚV
Ráðgjafi Alþjóðadýravelferðarsjóðsins og Hvalaskoðunarsamtaka Íslands fagnar því að matvælaráðherra geri kröfu um að einn í áhöfn hvalveiðiskips sæki námskeið í dýravelferð og taki myndband af veiði og drápi á hvölum. Hann telur að þetta leiði til þess að veiðar á stórhvelum leggist af.

Sigursteinn Másson, ráðgjafi Alþjóðadýravelferðarsjóðsins og Hvalaskoðunarsamtaka Íslands, segir að best hefði verið ef dýralæknar kæmu strax um borð í hvalveiðiskipin, líkt og matvælaráðherra áformar næsta sumar. 

Starf eins úr áhöfn verði eingöngu að mynda

„En þetta er kárlega mjög mikilvægt skref í rétta átt. Það er mjög mikilvægt að þarna er gerð krafa um það að myndataka fari fram allan tímann, á meðan á veiðunum stendur og alveg þar til hvalurinn hefur verið dreginn inn í hvalstöðina. Þannig að þarna verður einn úr áhöfninni bara í þessu, að gera þetta. Það er þá mikilvægt að Matvælastofnun sjái til þess að þetta verði gert sómasamlega,“ segir Sigursteinn.

Sigursteinn gagnrýnir harðlega veiðar á langreyði.

„Það er eiginlega hvert sem litið er tap á þessum veiðum og annað. Hvert sem litið er, þá er þetta í rauninni algjörlega órökrétt. Og ég treysti því og trúi að þetta muni leiða til þess að menn sjái að sér og hætti þessu. Enda hefur það komið í ljós við fyrri skoðanir sem hafa verið gerðar af Norðmönnum að það hefur tekið allt upp í 25 mínútur fyrir langreyði að drepast, eftir að sprengjuskutull með rúmlega fjögurra kílóa dýnamíthleðslu lenti í dýrinu. Þetta er náttúrulega algjörlega óviðundandi,“ segir Sigursteinn.

Sigurborg Daðadóttir yfirdýralæknir segir engar vísbendingar um að hér á landi sé farið á svig við lög um dýravelferð með hvaladrápi. Hins vegar hafi fram til þessa verið erfitt að sannreyna að farið sé að lögum. Nýju reglurnar séu til bóta.