Athugið þessi frétt er meira en 2 mánaða gömul.

Erfið ákvörðun að kæra Vítalíu og Arnar

28.06.2022 - 19:51
Mynd: MS / MS
Ari Edwald, einn þriggja manna sem kærði Vítalíu Lazarevu og Arnar Grant fyrir tilraun til fjárkúgunar segir að honum hafi verið nauðugur einn kostur að kæra. Þau eru kærð fyrir að krefja mennina um samtals 150 milljónir króna frá mönnunum þremur gegn því að Vítalía félli frá því að kæra þá fyrir kynferðisbrot. Slík kæra hefur ekki verið lögð fram.

Kæra þremenninganna, sem auk Ara eru þeir Hreggviður Jónsson og Þórður Már Jóhannesson  var lögð fram hjá embætti héraðssaksóknara á föstudaginn og samkvæmt lögmönnum þeirra fóru Arnar og Vítalía fram á 50 milljónir frá hverjum þeirra, alls 150 milljónir. Þetta hafi þeir átt að greiða gegn því að Vítalía félli frá því að kæra þá fyrir kynferðisbrot í sumarbústað í Skorradal í október 2020 sem hún sagði frá í hlaðvarpsþættinum Eigin konur í janúar.

Í framhaldi af því létu mennirnir þrír af störfum sínum; Hreggviður vék úr stjórn Veritas og annarra fyrirtækja, Ari hætti störfum sem framkvæmdastjóri Íseyjar útflutnings og Þórður Már lét af stjórnarformennsku í Festi.

Í þættinum sakaði Vítalía ennfremur þekktan fjölmiðlamann, sem síðar var sagður vera Logi Bergmann, um að hafa brotið á sér á hótelherbergi. Samkvæmt heimildum fréttastofu hefur meint fjárkúgun ekki beinst gegn honum.

Í mars sagði Vítalía á Twitter að hún hefði bókað tíma hjá lögreglu til að kæra meint brot. Samkvæmt upplýsingum fréttastofu mætti hún ekki í þann tíma og veitti lögreglu engar frekari upplýsingar um málið þrátt fyrir að á eftir því væri gengið. Þá herma heimildir fréttastofu að Vítalía hafi ekki bókað annan tíma hjá lögreglu og að engin kæra af þessu tagi hafi verið lögð fram.

Samkvæmt upplýsingum fréttastofu er kæra þremenninganna byggð á 251. grein almennra hegningarlaga sem kveður á um að hver sem hefur fé af öðrum með því að hóta fólki eða vandamönnum þess ofbeldi eða að hafa uppi rangan sakburð eða annan sakburð, þó sannur sé, skuli sæta fangelsi allt að sex árum, en þau eru einnig kærð fyrir að hafa áreitt vini og skyldmenni þremenninganna.

Ari Edwald sagði í samtali við fréttastofu að það hefði verið erfið ákvörðun að setja málið í þann farveg að kæra þau Arnar og Vítalíu. Honum væri ljóst að meðferð málsins gæti tekið langan tíma, en hann hefði metið stöðuna þannig að honum væri nauðugur einn kostur. Að öðrum kosti væri hætt við að staðreyndir málsins kæmu ekki fram.

Fréttastofa hefur ítrekað reynt að ná tali af þeim Vítalíu og Arnari en ýmist hefur ekki náðst í þau eða þau ekki gefið kost á viðtali.