Athugið þessi frétt er meira en 5 mánaða gömul.

Sameiginlegt átak þarf til að bregðast við verðhækkunum

20.06.2022 - 08:35
Mynd með færslu
 Mynd: Kristján Þór Ingvarsson - RÚV
Matvælaráðherra segir að allir þurfi að taka þátt í bregðast við hækkunum í landbúnaðarframleiðslu. Bændur hafa fengið rekstrarhækkun að hálfu bætta en afganginn þurfa afurðastöðvar, verslanir og neytendur að greiða. Ráðherra segir að fæðuöryggi snúist ekki aðeins um aðgengi að mat heldur einnig að gætt sé efnahagslegs jöfnuðar. 

Landbúnaðurinn fær tvo og hálfan milljarð króna í formi styrkja frá ríkinu til að mæta auknum rekstrarkostnaði. Hann verður með þessu að hálfu bættur. Bændur, afurðarfyrirtæki, verslanir og neytendur þurfa því að taka á sig tvo og hálfan milljarð króna. Þetta kemur fram í skýrslu svonefnds Spretthóps matvælaráðherra. En óttast matvælaráðherra ekki að verð á landbúnaðarvöru verði of hátt fyrir neytendur?

„Eftir að hafa fylgst með viðbrögðum við þessum aðgerðum, þessum afgerandi aðgerðum stjórnvalda, og það í raun og veru að við siglum inn í þetta af fullum krafti, þá tel ég það algerlega liggja í loftinu að við þurfum öll að snúa bökum saman og ekki síður afurðastöðvarnar og smásalan í því skyni að bregðast við þessu,“ segir Svandís Svavarsdóttir matvælaráðherra.

En óttastu að það verði annað áfall á landbúnað því t.d. í Bankahruninu fór fólk að leita í ódýrari matvöru. Fór að taka slátur, kaupa bjúgu og fiskibollur í dós. Þannig að bændur fá kannski minna út úr því. Óttastu eitthvað svoleiðis?

„Þetta verður allt að koma í ljós. Við verðum líka að horfast í augu við mikilvægi þess að við séum að neyta hollrar og heilnæmrar matvöru. Það er auðvitað verkefnið hér eftir sem hingað til. Það er náttúrulega það sem fæðuöryggi snýst um, ekki bara aðgengi að mat heldur líka það að þar sé gætt efnahagslegs jöfnuðar. Það skiptir líka máli. Þannig að ég held að við þurfum bara að hafa mjög opin augun. Þessi umræða um fæðuöryggi er svolítið ný fyrir okkur. En grunnurinn að fæðuöryggi er líka bara stóraukin kornrækt. Þar þurfum við virkilega að gefa í vegna þess að við erum þegar öllu er á botninn hvolft líka alltaf háð ákveðnum aðföngum,“ segir Svandís.