Athugið þessi frétt er meira en 2 mánaða gömul.

Endurvekja samtal um jarðgöng milli lands og Eyja

09.06.2022 - 19:56
Mynd með færslu
 Mynd: RÚV
Bæjarstjórn Vestmannaeyja samþykkti á fyrsta fundi nýrrar bæjarstjórnar sem fram fór í dag, að efna til samtals við ríkið um fýsileika jarðganga á milli lands og Eyja.

Þetta kemur fram í fundargerð bæjarstjórnar Vestmannaeyjabæjar. Njáll Ragnarsson fulltrúi E-lista, lagði fram tillöguna sem var samþykkt samhljóða. Bæjarstjóra og bæjarráði er falið að leiða samtal við stjórnvöld en í því fellst að afla gagna sem þegar liggja fyrir varðandi rannsóknir á jarðlögum og ljúka þeim. Einnig að uppfæra gögn sem þegar eru til um þjóðhagslegn ávinningi jarðganganna. 

Í greinargerð þar sem samþykkta tillagan er útfærð nánar segir að lengi hafi verið rætt um möguleikann á jarðgöngum milli lands og Vestmannaeyja. Á síðasta ári hafi verið lögð fyrir Alþingi þingsályktunartillaga um rannsóknir á jarðlögum milli Heimaeyjar og Kross í Landeyjum með tilliti til fýsileika jarðgangna á milli lands og Eyja. 

„Forkönnun var unnin árið 2000 þar sem ýmsir möguleikar voru skoðaðir, þar á meðal botngöng og flotgöng. Rannsóknir á jarðlögum hafa aftur á móti ekki verið kláraðar til fulls og því mikilvægt að halda verkefninu áfram þannig að úr því verði skorið hvort mögulegt sé að koma á vegtengingu milli lands og Eyja,“ segir í greinargerðinni.

Þjóðhagslegur ábati geti numið um 95 milljörðum

Bent er á í greinargerðinni að í meistararitgerð frá árinu 2020 hafi Víðir Þorvarðarson gert kostnaðar- og ábatagreiningu á jarðgöngum milli lands og Vestmannaeyja. Þar komi fram að þjóðhagslegur ábati af Vestmannaeyjagöngum geti verið um 95 milljarðar króna.

Ekki þurfi að fjölyrða um sparnað sem fælist í gerð jarðgangna en sem dæmi megi nefna að rekstur Herjólfs sé á ári um 650 milljónir, dýpkun Landeyjahafnar kosti um 400 milljónir á ári og nýtt skip, sem endurnýja þurfi á 10-15 ára fresti kosti um 5 milljarða. 

„Þá er ljóst að samfélagslegur kostnaður vegna frátafa í siglingum til Landeyjahafnar er gríðarlegur ár hvert. Aukin heldur er ljóst að mikill kostnaðarauki felst í lagningu sæstrengja á hafsbotni milli lands og eyja, t.d. vatnsleiðslu, rafmagnsleiðslu og ljósleiðara í samanburði við lagningu í göngum,“ segir í greinargerðinni.

Sveinn Ólafur Melsted