Athugið þessi frétt er meira en 1 mánaða gömul.

Biðst afsökunar á ummælum um meðferðir fyrir trans börn

Mynd með færslu
 Mynd: Ingvar Haukur Guðmundsson - RÚV
Björn Hjálmarsson, yfirlæknir á barna- og unglingageðdeild Landspítala, biðst afsökunar á þeim orðum sem höfð voru eftir honum um meðferðir fyrir trans börn í Stundinni í dag.

Í Stundinni í dag er haft eftir mér að ég hafi efasemdir um vísindalegar forsendur þeirra meðferða sem Landspítali veitir transbörnum og ungmennum. Þetta er rangt og ég biðst velvirðingar á þeim orðum,“ segir í áréttingu á vef Landspítalans.

Þar segir enn fremur að þjónustan sem transteymi BUGL veitir börnum og ungmennum byggi á alþjóðlegum viðmiðum og  gagnreyndum rannsóknum. Teymið sé skipað þverfaglegum hópi sérfræðinga sem einsetji sér að veita skjólstæðingum eins góða þjónustu og meðferð og kostur er á.

„Reynslan af meðferð transbarna og ungmenna spannar ekki marga áratugi. Þess vegna er mikilvægt að fylgjast grannt með alþjóðlegum rannsóknarniðurstöðum sem og reynslu þeirra sem við viljum bera okkur saman við. Það munum við áfram gera í viðleitni okkar til að þjónusta viðkvæman hóp af þeirri virðingu og fagmennsku sem hann á skilið, í virku samtali við börnin og aðstandendur þeirra,“ segir í áréttingunni.

Stundin greindi frá tölvupósti sem Björn, sem tók við sem yfirlæknir á BUGL í upphafi mánaðar,  er sagður hafa sent í síðasta mánuði. Þar segir: „Við bíðum í ofvæni eftir gagnreyndum rannsóknarniðurstöðum um þennan viðkvæma hóp. Í dag erum við öll í myrkri aktívisma og fákunnáttu.“

Segir enn fremur í grein Stundarinnar að í póstinum hafi hann í reynd viðurkennt að meðferðarúrræði fyrir trans börn á Íslandi séu ekki gagnreynd vísindi eða réttnefnd læknisfræði. Þau byggi á „fákunnáttu“ og „aktívisma“.