Endursending flóttabarna til Grikklands í bága við lög

Samkvæmt nýútgefinni skýrslu Rauða kross Íslands hefur flóttafólk í Grikklandi takmarkað aðgengi að húsnæði, heilbrigðisþjónustu, menntun, félagslegri aðstoð og atvinnu.

Fyrirhugað er að vísa um 300 hælisleitendum úr landi nú þegar brottvísanir eru hafnar á ný eftir kórónuveirufaraldurinn. Flestir verða sendir til Grikklands, þar á meðal barnafjölskyldur. 

Gatan bíður þeirra í Grikklandi

Lögum samkvæmt er íslenskum stjórnvöldum skylt að hafa það sem barni er fyrir bestu í forgangi þegar teknar eru ákvarðanir um málefni þess. Atli Viðar Thorstensen, sviðstjóri hjá Rauða krossinum, segir að endursending flóttabarna til Grikklands geti tæpast verið í samræmi við lög. Í Grikklandi sé heilsu flóttabarna og velferð stefnt í mikla hættu, og yfirgnæfandi líkur á að þau verði heimilislaus eða búi við óviðunandi aðstæður.

„Búseta á götunni er það sem að bíður þeirra oft á tíðum og aðgengi að menntun er verulega skert, þannig að við teljum það sannarlega ekki þjóna hagsmunum barna.“ 

Standa ekki jafnfætis Grikkjum

Jón Gunnarsson dómsmálaráðherra sagði í viðtali í Morgunútvarpinu á Rás 2 í vikunni að fólk sem fái alþjóðlega vernd á Grikklandi búi við sömu skilyrði og Grikkir. „Það getur farið inn á vinnumarkaðinn, það býr við sömu aðstæður og Grikkir búa við,“ sagði Jón. Atli Viðar segir þetta ekki alls kostar rétt. „Ekki samkvæmt okkar mati og ekki samkvæmt áreiðanlegum skýrslum um ástandið í Grikklandi, og ekki í samræmi við frásagnir þeirra sem hafa komið hingað frá Grikklandi,“ segir Atli Viðar.

Réttindi flóttafólks séu tryggð í orði en ekki á borði. „Þannig að við getum alveg hafnað því að staða flóttafólks á Grikklandi sé jafnfætis hinum almenna Grikkja,“ segir Atli Viðar. 

Sem dæmi um ólíkan aðbúnað má nefna að grískir bankar hafa ítrekað synjað flóttafólki um að fá bankareikning, sem kemur í veg fyrir að þau geti tekið á móti launagreiðslum, og kemur þar með í veg fyrir að þau geti fengið vinnu.