Flestir vilja Dag sem borgarstjóra

13.05.2022 - 14:04
Mynd með færslu
 Mynd: RUV
Flestir vilja Dag B. Eggertsson sem borgarstjóra eftir kosningarnar á morgun ef marka má könnun Maskínu sem fréttastofa fékk í hendurnar í dag. 28,1% þeirra sem svöruðu vilja sjá oddvita Samfylkingarinnar í borgarstjórasætinu. 19,8% vilja heldur að Hildur Björnsdóttir, oddviti Sjálfstæðisflokks, taki við keflinu.

15,1% þátttakenda Maskínukönnunarinnar vilja sjá Einar Þorsteinsson sem borgarstjóra í Reykjavík, en Sanna Magdalena Mörtudóttir, oddviti Sósíalista og Dóra Björk Guðjónsdóttir pírati koma næst á eftir, með 10,8% og 10,0%.

6,2% svarenda vilja að næsti borgarstjóri verði oddviti Viðreisnar, Þórdís Lóa Þórhallsdóttir, og 5,4% vilja sjá Kolbrúnu Baldursdóttir í embættinu. Líf Magneudóttir hjá VG og Ómar Már Jónsson miðflokksmaður njóta tvö prósent fylgis. 

Innan við 1 prósent vilja sjá Jóhannes Loftsson og Gunnar H. Gunnarsson í borgarstjórastóli.

Dagur er vinsælastur hjá aldurshópnum 60 ára og eldri, og Hildur höfðar helst til þátttakenda á aldrinum 50 - 59 ára. Einar Þorsteinsson er einna vinsælastur á meðal þátttakenda á aldrinum 40 - 60 ára en hjá yngsta aldurshópnum, 18 - 29 ára, eru Sanna Magdalena, Dóra Björt og Þórdís Lóa vinsælastar.

Þegar kemur að einstökum málefnum treysta flestir Sjálfstæðisflokknum til að sinna fjármálum í borginni, en fleiri treysta Samfylkingunni til að sinna samgöngu-, skóla-, og skipulagsmálum. Þá treysta flestir Vinstri Grænum til að sinna umhverfismálum í borginni.

Pétur Magnússon