Athugið þessi frétt er meira en 9 mánaða gömul.

Komið að ögurstundu hermanna í Mariupol

08.05.2022 - 07:10

Deilur og stríð · Erlent · aðskilnaðarsinnar · Azov-herdeildirnar · Azov-stálverksmiðjan · G7 · hermenn · Krímskagi · Kyiv · Luhansk · Mariupol · Rússland · Síðari heimsstyrjöldin · Sprengjuárás · Vladímír Pútín · Volodymyr Zelensky · Evrópa · Stjórnmál

epa09930485 People participate in #SaveMariupol rally in Lviv, Ukraine, 06 May 2022. Activists gathered to call on world leaders to help organize a humanitarian corridor for the evacuation of civilians and soldiers from the Russian-sieged city of Mariupol. On 24 February, Russian troops invaded Ukrainian territory starting a conflict that has provoked destruction and a humanitarian crisis. According to the United Nations High Commission for the Refugees (UNHCR) last report on the situation of Ukraine released on 05 May, more than 5.7 million refugees have fled Ukraine making this the fastest growing refugee crisis since World War II. EPA-EFE/MYKOLA TYS

Mynd: EPA-EFE - EPA

Úkraínumenn óttast að aukinn þungi færist í aðgerðir rússneska innrásarliðsins og að allt kapp verði lagt á að ná yfirráðum yfir Azov-stálverksmiðjunni í Mariupol í dag. Loftvarnaflautur hljómuðu um nær alla Úkraínu seint í nótt og í morgun.

Vitað er að tveir fórust í sprengjuárás sem rússneskar hersveitir gerðu á skóla í þorpinu Bilohorivka í nótt. Reuters fréttastofan hefur þetta eftir Serhiy Gaidai héraðsstjóra í Luhansk.

Hann fullyrðir að minnst sextíu manns hafi farist en að níutíu hafi verið innandyra þegar sprengjan féll. Héraðsstjórinn segir að þrjátíu hafi þegar verið bjargað úr rústum byggingarinnar.

Rússnesk yfirvöld hafa ekki tjáð sig um árásina né hafa upplýsingar héraðsstjórans verið staðfestar með öðrum heimildum. Loftvarnaflautur ómuðu um alla Úkraínu nú í bítið samkvæmt frétt úkraínska miðilsins Kyiv Independent.

Líklegt þykir að ögurstund blasi við þeim úkraínsku hermönnum, meðal annars úr Azov-hersveitunum, sem enn eru til varnar við stálverksmiðju í Mariupol.

Rússneska umsátursliðið hyggst í dag færa Vladimír Pútín Rússlandsforseta Mariupol sem sigurlaun í tilefni Sigurdagsins 9. maí að sögn Oleksiy Arestovych talsmanns Úkraínuforseta.

Þann dag minnast Rússar sigurs yfir Þýskalandi við lok síðari heimsstyrjaldar árið 1945. Stálverksmiðjan er síðasta vígi Úkraínumanna í Mariupol en alger yfirráð borgarinnar tryggja landbrú frá Krímskaga til þeirra héraða í austanverðri Úkraínu þar sem aðskilnaðarsinnar ráða ríkjum.

Volodymyr Zelensky ræðir í dag við leiðtoga G7 ríkjanna, gegnum fjarfundabúnað, en hann óttast að sóknarþungi innrásarliðsins aukist enn eftir að almennum borgurum var bjargað úr stálverksmiðjunni í Mariupol.