Athugið þessi frétt er meira en 2 mánaða gömul.

Bjartsýnistónn í voldugum evrópskum flugrekendum

epa04395464 An Air France flight 338, a Boeing 747-400,  from Charles de Gaulle/Roissy airport in Paris, France approaching Edward F. Logan airport in Boston, Massachusetts, USA, 10 September, 2014.  EPA/MATT CAMPBELL
 Mynd: EPA
Heldur rofaði til í rekstri fransk-hollenska flugfélagsins AirFrance-KLM á fyrsta fjórðungi ársins. Enn er tap af rekstrinum en aðeins þriðjungur af því sem var fyrir ári. Sama er uppi á teningnum hjá hinu þýska Lufthansa.

AirFrance-KLM hefur tapað gríðarlegum fjárhæðum undanfarin tvö ár, frá því að kórónuveirufaraldurinn skall á. Tap félagsins á þeim tíma er um ellefu milljarðar evra. Þrisvar sinnum fleiri farþegar flugu með vélum þess fyrstu þrjá mánuði þessa árs en í fyrra.

Þrátt fyrir hækkandi olíuverð, verðbólgu og stríð í Úkraínu segja stjórnendur félagsins að aukin eftirspurn sé eftir flugferðum og búast við hagnaði þegar líður á árið.

Stjórnendur Lufthansa búast við metfarþegafjölda í sumar og þakka það því hve mjög og víða hefur dregið úr takmörkunum vegna COVID-19. Fjöldi farþega meira en fjórfaldaðist fyrstu þrjá mánuði ársins, í þrettán milljónir úr þremur á sama tíma 2021. 

Carsten Spohr, stjórnarformaður Lufthansa, segir að bókunum fjölgi í hverri viku. Einkum séu það frí- og ferðalagaþyrstir sem bóki flug. Enn er nokkuð langt í land með að jafnmikið sé um viðskiptaferðir og var fyrir faraldurinn.

Stjórnendur Lufthansa gera ráð fyrir enn bjartari tíð á næstu mánuðum en vara þó við að ferðakostnaður kunni að hækka.