Reykjavíkurborg slítur samstarfi við Moskvu

Mynd með færslu
 Mynd: Kristján Ingvarsson - RÚV
Dagur B. Eggertsson, borgarstjóri Reykjavíkur, segir að Reykjavíkurborg ætli að slíta samstarfi við höfuðborg Rússlands, Moskvu. Til stendur að taka upp tengsl við Úkraínsku borginna Lvív. 

„Við samþykktum einróma mótmæli gegn innrás Rússa í borgarstjórn á dögunum um leið og innrásin hófst. Ég hef komið þeim mótmælum á framfæri við borgarstjóra og borgarstjórn Moskvu en ekki fengið nein í viðbrögð. Í mínum huga er því alls ekkert óeðlilegt að fjalla um næstu skref í þessu," segir Dagur. 

Sérstakur samningur var gerður á milli Reykjavíkurborgar og Moskvu árið 2007, í opinberri heimsókn Vilhjálms Þ. Vilhjálmssonar, þáverandi borgarstjóra. Moskva er eina rússneska borgin sem Reykjavík á í samstarfi við. Sambandinu hefur ekki verið slitið formlega en búið er að stöðva allt samstarf á grundvelli samnings borganna. 

Mögulega samstarf við Lvív

Dagur átti fjarfund með borgarstjóranum í Lvív í síðustu viku. „Þar ræddum við þetta mál annars vegar. Þar kom fram sú eindregna ósk þeirra að við gengjum lengra í að slíta þessi tengsl og taka upp tengsl við Lvív í staðinn.“ Dagur segir að hann geri ráð fyrir að málið verði tekið til umfjöllunar á fundi borgarráðs í vikunni, að því gefnu að bréf frá borgarstjórninni í Lvív hafi borist. 

urduro's picture
Urður Örlygsdóttir