Athugið þessi frétt er meira en 4 mánaða gömul.

Sigurður Ingi kærður fyrir brot á siðareglum Alþingis

11.04.2022 - 13:52
Mynd með færslu
 Mynd: RÚV
Forsætisnefnd Alþingis hefur borist kæra gagnvart Sigurði Inga Jóhannssyni, innviðaráðherra, fyrir brot á siðareglum Alþingis. Þetta staðfestir Birgir Ármannsson, forseti Alþingis og forsætisnefndar, við fréttastofu.

Gert er ráð fyrir að erindið verði tekið fyrir á næsta fundi forsætisnefndar. Ekki liggur fyrir hver lagði inn kæruna, en hún snýr að ummælum Sigurðar Inga um Vigdísi Häsler, framkvæmadstjóra Bændasamtakanna, í gleðskap tengdum Búnaðarþingi á dögunum. Nákvæmlega hver ummælin voru er ekki ljóst, en samkvæmt heimildum fréttastofu sneru þau meðal annars að húðlit hennar. Sigurður Ingi og Vigdís hafa náð sáttum, eftir að ráðherrann baðst afsökunar á ummælunum. 

Forsætisnefnd fjallaði meðal annars um brot Klausturmanna á siðareglum þingmanna Alþingis. Þá voru það átta þingmenn sem lögðu inn kæru.