Athugið þessi frétt er meira en 5 mánaða gömul.

Tíu hafa sagt upp hjá Eflingu frá því í febrúar

31.03.2022 - 14:16
Mynd með færslu
 Mynd: Ragnar Visage - RÚV
Tíu starfsmenn á skrifstofu Eflingar sögðu upp störfum í febrúar og mars. Þá renna tímabundnir samningar við þrjá starfsmenn auk varaformanns félagsins út um mánaðamótin. Þetta segir í svari framkvæmdastjóra Eflingar við fyrirspurn fréttastofu.

Breytingar eru í vændum í stjórn Eflingar eftir að Sólveig Anna Jónsdóttir var kjörin formaður í stjórnarkosningum í febrúar. Hún hafði sagt af sér sem formaður í október 2021 vegna þess sem hún sagði vera afdráttarlausa vantraustsyfirlýsingu á hendur sér frá starfsfólki Eflingar.

Kosningabaráttan fyrr á árinu var hörð og snerist að þó nokkru leyti um starfsfólkið á skrifstofu Eflingar.

„Ef að svo fer að ég og Baráttulistinn berum sigur úr býtum og að á skrifstofunni er fólk sem getur ekki hugsað sér að starfa með mér er það auðvitað þeirra að taka ákvörðun um það og einfaldlega fara annað“ sagði Sólveig í viðtali í Kastljósi þann 10. febrúar, fimm dögum fyrir stjórnarkosningarnar.

Nýkjörnir stjórnarmenn geta ekki tekið sæti fyrr en á aðalfundi Eflingar. Samkvæmt upplýsingum frá framkvæmdastjóra verður fundurinn haldinn þann 8. apríl, eftir rúma viku, og verður auglýstur á morgun.