Athugið þessi frétt er meira en 4 mánaða gömul.

Vonskuveður gengur yfir - Hellisheiði og Þrengsli lokuð

Mynd með færslu
 Mynd: Skjáskot - Veðurstofan
Samhæfingamiðstöð almannavarna var virkjuð klukkan átta. Vonskuveður gengur yfir landið í dag. Búið er að loka vegum um Hellisheiði og Þrengsli. Veðrið skellur fyrst á Suðvesturlandi en gengur svo norður og austur yfir landið.

Haraldur Eiríksson, veðurfræðingur á Veðurstofu Íslands, segir að veðrið gangi ekki niður fyrr en seint í dag og í kvöld, og þá fyrst suðvestanlands.

Hvað eigið þið von á mikilli veðurhæð?

„Það er spáð víða þetta 20-28 metrum á sekúndu. Þetta byrjar sem slydda og snjór en það er svona að komast yfir í rigningu hérna við suðvesturströndina og það hlánar á Suður- og Vesturlandi. Vestfirðir verða væntanlega í snjókomu í allan dag en Norðurland fær mjög litla úrkomu. Það sem kemur verður snjókoma og það skefur líka." 

„Sér fyrir endann á þessu eftir að þetta gengur yfir í kvöld eða eigum við von á fleiri  lægðum næstu daga eða viku?"

  „Það er útlit fyrir að veðrið róist um helgina, það er að segja þetta gengur svona hægt og rólega niður. Strekkingur á morgun og svo frekar hægur vindur á sunnudag. Svo er næsta lægð væntanleg á mánudag en vonandi ekki eins slæm og þessi."

Ólöf Rún Skúladóttir