Athugið þessi frétt er meira en 5 mánaða gömul.

Játa mistök og ætla að endurgreiða mismun á rafmagni

07.02.2022 - 09:09
Innlent · N1 · rafmagn · Raforkusala
Mynd með færslu
 Mynd: RÚV - Þór Ægisson - RÚV
N1 rafmagn hefur ákveðið að endurgreiða þeim viðskiptavinum sem fluttir voru sjálfkrafa í viðskipti við fyrirtækið í gegnum þrautavaraleið þann mismun sem var á auglýstum taxta og þrautavarataxta frá upphafi. Þetta kemur fram í tilkynningu frá fyrirtækinu. 

Yfirvöld hafa sett upp kerfi þannig að fólk þarf að velja orkusala þegar það flytur, geri fólk það ekki er það flutt í viðskipti við þrautavarasala, sá er valinn á grundvelli lægsta verðs á almennum markaði. 

Þó nokkuð hefur verið fjallað um rukkanir N1 rafmagns síðustu daga. Hinrik Örn Bjarnason, framkvæmdastjóri N1, baðst afsökunar í yfirlýsingu í janúar á því að N1 rafmagn hefði ekki brugðist fyrr við athugasemdum um hátt verð sem fólk greiðir sé það flutt sjálfkrafa í viðskipti við fyrirtækið í gegnum þrautavaraleið. 

Heildarupphæð allt að 40 milljónir

„Félagið tók fyrst við sem sölufyrirtæki til þrautavara 1. maí 2020 en enginn munur var á auglýstum taxta til heimila og þrautavarataxta til heimila fram til mars 2021. Endurgreiðslan á því við um tímabilið 1. mars 2021 til 31. október 2021 og getur heildarupphæð numið allt að 40 milljónum króna. Þegar hefur verið endurgreitt til viðskiptavina fyrir tímabilið 1. nóvember 2021 til 31. desember 2021,“ segir í tilkynningu frá N1 um endurgreiðsluna í dag.

Þá segir enn fremur að það hafi verið ósk N1 rafmagns að fá sanngjarna niðurstöðu í málið. Leitað hafi verið til Orkustofnunar um leiðsögn. Þar sem Orkustofnun hafi ekki birt félaginu niðurstöður sínar eða svarað spurningum um N1 rafmagn sem orkusala til þrautavara þyki fyrirtækinu nauðsynlegt að koma til móts við þrautavaraviðskiptavini félagsins eins fljótt og kostur er með endurgreiðslu á uppgefnu tímabili. 

„Um leið er beðist velvirðingar á ofangreindu misræmi í verðlagningu og munu allir viðskiptavinir sem koma í gegnum þrautavaraleið færast á lægsta taxta félagsins hér eftir,“ segir í tilkynningunni.

Játar mistök

N1 rafmagn var fyrsta sölufyrirtækið til að sinna hlutverki orkusala til þrautavaraleiðar stjórnvalda, samkvæmt tilkynningu fyrirtækisins. Þar segir að erfitt hafi reynst að átta sig á umfangi og kostnaði sem fylgir því að afla orku fyrir þennan hóp viðskiptavina og því hafi þurft að kaupa dýrari raforku á skammtímamarkaði til að mæta eftirspurn.

Í mars 2021 hafi félagið brugðið á það ráð að hækka þrautavarataxta í samræmi við verð á skammtímamarkaði og túlkun N1 rafmagns á reglugerð um sölufyrirtæki til þrautavara. N1 rafmagn harmi það að hafa hækkað þrautavarataxta án þess að leita fyrst annarra leiða til að veita öllum viðskiptavinum sama verð og auglýst er.

„Frá því að N1 rafmagn var fyrst valið sölufyrirtæki til þrautavara, hefur meðalverð á skammtímamarkaði hækkað um 75 prósent. Frjáls raforkumarkaður fyrir neytendur er enn að mótast eins og ljóst er af því að íslenskir neytendur skipta síður um raforkufyrirtæki en neytendur í löndum sem við berum okkur saman við. Það er ætlun okkar hjá N1 rafmagni að keppa á íslenskum raforkumarkaði, neytendum til hagsbóta. Við gerðum mistök, öxlum ábyrgð á þeim og munum læra af þessu máli. Við munum halda ótrauð áfram að bjóða landsmönnum upp á samkeppnishæft raforkuverð og hvetjum jafnframt neytendur til að bera saman verð og velja sér raforkusala sjálfir á þeim grunni,” er haft eftir Hinriki Erni framkvæmdastjóra í tilkynningunni.

N1 rafmagn segist að auki kalla eftir því frá stjórnvöldum að reglugerð varðandi þrautavaraleið verði skýrð enn frekar og endurskoðuð „með það að markmiði að fleiri neytendur velji sér raforkusala sjálfir með upplýstari og gagnsærri hætti en nú er og mistök sem þessi endurtaki sig ekki.“