Athugið þessi frétt er meira en 4 mánaða gömul.

Íslenskar mæðgur í 15 ára bann frá hundarækt

28.01.2022 - 23:00
Mynd með færslu
 Mynd: Ásrún Brynja Ingvarsdóttir - RÚV
Íslenskar mæðgur sem hafa ræktað Schäfer hunda undir nafninu Gjóska hafa verið uppvísar að stórfelldum brotum gegn lögum Hundaræktarfélags Íslands. Þær hafa verið útilokaðar frá allri starfsemi félagsins og sviptar ræktunarnafni sínu næstu fimmtán árin. Brotið og úrskurðurinn á sér engin fordæmi.

Sakaðar um margvísleg brot

Stjórn Hundaræktarfélags Íslands kærði mæðgurnar til siðanefndar félagsins. Í úrskurði Siðanefndar sem telur 67 blaðsíður eru sex brot mægðnanna að mati félagsins útlistuð.

  • Þeim er gefið að sök að hafa skráð vísvitandi ranga ræktunartík á nokkur pörunarvottorð við umsókn um ættbókarskráningu gota, sem hafði þær afleiðingar að útgefnar ættbækur gotanna voru efnislega rangar.
  • Að hafa brotið gegn skyldum sínum sem ræktendur með því að mæta ekki með hunda í lífsýnatöku til sönnunar á ætterni.
  • Að hafa neitað að gefa upplýsingar eða svara fyrirspurnum með útúrsnúningum.
  • Að hafa með fölsun og kosningasvindli tilkynnt eigendaskipti á tík þann 18. júní, sem hafði verið aflífuð viku fyrr, í þeim tilgangi að veita sambýlismanni annarrar konunnar kjörgengi og atkvæðisrétt á aðalfundi Schaferdeildar HRFÍ, sem hann átti annars ekki rétt til.
  • Að hafa brotið gegn framkvæmdastjóra félagsins með meiðyrðum með því að saka hann um refisverða háttsemi og freklega varpa rýrð á störf hans í þágu félagsins.
  • Og að hafa ætlað  að para undaneldishund við ónefnda tík sem ekki var ættbókarfærð hjá HRFÍ. 

Brotin og niðurstaðan algjört einsdæmi

Að mati siðanefndar eiga mæðgurnar sér litlar sem engar málsbætur. Í niðurstöðum nefndarinnar segir að þær hafi í málatilbúnaði sínum ítrekað gert lítið úr kæruefninu, alvarleika málsins og lögum og reglum félagsins. Þær eru áminntar og þeim vísað úr félaginu næstu fimmtán ár, útilokaðar frá allri þátttöku í starfi þess næstu fimmtán árin, útilokaðar frá rétti til að fá afhent ættbókarskírteini næstu fimmtán ár og sviptar ræktunarnafninu Gjósku. Þá segir jafnframt í úrskurðinum að hvergi sé að finna fordæmi um viðlíka brot og reynir á í málinu. 

Vildu fá úrskurðinn dæmdan ógildan

Héraðsdómur Reykjavíkur vísaði í vikunni frá dómi máli sem mæðgurnar höfðuðu gegn Hundaræktarfélaginu. Deilan stóð þá um störf og bráðabirgðaúrskurð siðanefndar í þessu máli. Mæðgurnar vildu meðal annars að dómstóllinn dæmdi ógildan úrskurð siðanefndar, sem var þá ekki búin að kveða upp úrskurð sinn. 

solveigk's picture
Sólveig Klara Ragnarsdóttir
Fréttastofa RÚV