Athugið þessi frétt er meira en 4 mánaða gömul.

Fjögur börn á spítala með eða vegna COVID-19

Mynd með færslu
 Mynd: Landspítalinn
Fjögur börn liggja nú á Landspítala með eða vegna COVID-19. Þetta kemur fram í orðsendingu farsóttanefndar. Af þeim 35 sjúklingum sem eru inniliggjandi með COVID-19 eru 27 í einangrun með virkt smit. Sex sjúklingar voru lagðir inn í gær en fjórir útskrifaðir. Spítalinn biður starfsmenn um að vera á varðbergi því reikna megi með að smitum eigi eftir að fjölga og nauðsynlegt sé að vernda þá fyrir smiti sem liggja inni.

Ríkisstjórnin blés í morgun til fréttamannafundar þar sem afléttingaráætlun stjórnvalda var kynnt.

Fyrsta skrefið er tekið strax á miðnætti þegar samkomutakmarkanir verða rýmkaðar og skemmtistöðum gert kleift að opna að nýju. Næsta skref verður tekið 24. febrúar þegar samkomutakmarkanir verða rýmkaðar enn frekar og síðasta skrefið verður tekið 14. mars ef allt gengur samkvæmt áætlun. Þá stendur til að aflétta öllum sóttvarnaaðgerðum.

Farsóttanefnd segir viðbúið að fjölmargir þeirra sem leiti til spítalans vegna annarra vandamála séu smitaðir. „Þetta mun valda auknu álagi á legudeildir, göngudeildir, bráðamóttökur og rannsóknardeildir. “ Ekki er reiknað með að sjúklingum á gjörgæsludeild vegna COVID eigi eftir að fjölga en þeir sem þurfi að leggjast inn á gjörgæslu vegna annarra vandamála geti verið smitaðir.

Farsóttanefnd minnir á að Landspítala beri að vernda mikilvæga starfsemi sína með öllum tiltækum ráðum og það sé ætlast til þess að hann gangi langri en gert er almennt í samfélaginu. 

freyrgigja's picture
Freyr Gígja Gunnarsson
Fréttastofa RÚV