Athugið þessi frétt er meira en 5 mánaða gömul.

Tryggja áframhaldandi vopnahlé í austurhluta Úkraínu

epa09710471 People walk past a lettering 'I love Ukraine' in the central squire in Kiev, Ukraine, 26 January 2022. US and Britain announced withdrawal of some diplomats, nonessential personnel, and family members from their embassies in Kiev amid growing fears of a Russian invasion. Russia has recently strengthened its groups near the border with Ukraine and Belarus, with no signs of de-escalation, Pentagon spokesman John Kirby said on 24 January.  EPA-EFE/ZURAB KURTSIKIDZE
 Mynd: EPA-EFE - EPA
Sendinefndir Rússa og Úkraínumanna sammæltust í dag um að virða vopnahlé Úkraínustjórnar og aðskilnaðarsinna hliðhollra Rússum. Átök brutust út í austurhluta Úkraínu árið 2014 en vopnahléssamkomulag náðist 2015.

Þýsk og frönsk stjórnvöld skipulögðu fundinn en sendinefndirnar ræddu saman í París í átta klukkustundir. Dmitry Kozak sem fer fyrir rússnesku sendinefndinni sagði að ákveðið hefði verið að vopnahléð héldi og kvaðst vonast eftir endanlegri niðurstöðu eftir tvær vikur. 

Kozak sagði grundvallarniðurstöðuna þá að ábyrgðin á því að vopnahléð verði ekki rofið liggi hjá Úkraínuher og vopnuðum sveitum í Donetsk og Luhansk-héruðum Úkraínu. 

AFP-fréttaveitan hefur eftir ónafngreindum aðstoðarmanni Emmanuels Macron Frakklandsforseta að niðurstöður dagsins lofi góðu um framhaldið en ætlunin er að fulltrúar ríkjanna hittist að nýju í Berlín í annarri viku febrúar.

Aðstoðarmaðurinn lagði áherslu á að viðræðurnar snerust um að stöðva átök við aðskilnaðarsinna en ekki um mögulega innrás Rússa í Úkraínu. Kozak tók undir það.

Ríkin fjögur hafa unnið að lausn mála allt frá árinu 2014 en sex árum síðar var vopnahléssamkomulag ríkjanna frá 2015 ítrekað. Það var eftir fund Vladímírs Pútín Rússlandsforseta og Volodymyrs Zelensky forseta Úkraínu í desember 2019.

Sendinefndirnar fögnuðu því að loks miðaði í samkomulagsátt, í fyrsta sinn síðan þá. Ekki er ætlunin að þeir ræði saman að svo komnu máli. Því verða viðræðurnar í Berlín með sama sniði og í París í dag.

Um það bil 13 þúsund hafa fallið í átökum stríðandi fylkinga í austurhluta Úkraínu en vestræn ríki óttast að Rússar noti það sem átyllu fyrir innrás ef átök blossa þar upp að nýju.