Mynd: Brynjólfur Þór Guðmundsson - RÚV
Athugið þessi frétt er meira en 4 mánaða gömul.
Segir af sér formennsku vegna vændismáls
Einar Hermannsson hefur sagt af sér sem formaður SÁÁ. Hann segist í yfirlýsingu hafa svarað vændisauglýsingu á netinu fyrir nokkrum árum. Hann segir að sú hegðun sé ófyrirgefanleg. Einar tók við formennsku í SÁÁ fyrir einu og hálfu ári síðan. Hann segir að umræða um þetta yrði einungis til þess að varpa rýrð á SÁÁ ef hann sæti þar áfram sem formaður. Hann segir því af sér og biðst afsökunar.
„Fyrir nokkrum árum svaraði ég auglýsingu á netinu þar sem í boði var kynlíf gegn greiðslu. Sú hegðun er ófyrirgefanleg en ég taldi mér ranglega trú um að þau samskipti væru grafin og gleymd og þau hafa ekki haft áhrif á störf mín fyrir SÁÁ. Ljóst er hins vegar að umræða um þetta mál er einungis til þess fallin að varpa rýrð á SÁÁ ef ég sit þar áfram sem formaður,“ segir Einar í yfirlýsingu sinni.
Hann hyggst ekki tjá sig frekar um málið en segir: „Ég iðrast að hafa farið þessa leið og að hafa valdið fjölskyldu minni sársauka vegna hegðunar minnar. Bið ég alla þá sem málið varðar afsökunar á framferði mínu.“
