Athugið þessi frétt er meira en 4 mánaða gömul.

Óvissuástand og átök í Búrkína Fasó

24.01.2022 - 01:45
A mutinous soldier fires into the air at the Bobo interchange, near the Lamizana camp in Burkina Faso's capital Ouagadougou Sunday Jan. 23, 2022. Witnesses are reporting heavy gunfire at a military base raising fears that a coup attempt is underway. Government spokesman Alkassoum Maiga acknowledged the gunfire but denied that the military had taken over the West African country. (AP Photo/Sophie Garcia)
Hermenn úr hópi uppreisnarmanna á verði nærri Lamizama-herstöðinni í Ouagadougou, sem þeir yfirtóku á sunnudag. Mynd: AP
Óvissuástand ríkir í Vesturafríkuríkinu Búrkína Fasó, þar sem óttast er að uppreisn innan hersins sé hafin og að jafnvel sé hætta á valdaráni í landinu í kjölfarið. Skothríð barst ítrekað frá herstöð í höfuðborginni Ouagadougou um nokkurra klukkustunda skeið fyrripart sunnudags og seint á sunnudagskvöld bárust fréttir af skothríð nærri heimili forsetans, Roch Marc Christian Kabore, í borginni.

Fregnir bárust af því á sunnudag að flokkar hermanna, sem ósáttir eru við yfirstjórn hersins og hvernig baráttunni gegn vígasveitum íslamista í landinu hefur verið háttað, hefðu gert uppreisn gegn yfirboðurum sínum og náð nokkrum herstöðvum í landinu á sitt vald, meðal annars Lamizama-herstöðinni í Ouagadougou.

Krefjast þeir brottreksturs hershöfðingjanna og meiri og betri búnaðar, sem dugar til að takast á við vígasveitirnar, sem vaðið hafa uppi í landinu um margra ára skeið og framið þar fjölda grimmdarverka.

Hörð mótmæli í höfuðborginni

Fjöldi fólks lagðist á sveif með uppreisnarhermönnunum í höfuðborginni, segir í frétt AFP. Mótmælendur komu meðal annars upp vegartálmum á nokkrum helstu leiðum og fóru ránshendi um höfuðstöðvar flokks forsetans áður en þeir lögðu eld að byggingunni.

Lögreglu tókst á endanum að dreifa mannfjöldanum og stjórnvöld lýstu yfir útgöngubanni um óákveðinn tíma frá klukkan átta á sunnudagskvöld. Það hefur ekki haldið, ef marka má nýjustu fréttir.

Ríkisstjórnin hefur þvertekið fyrir að valdarán sé yfirvofandi og þeir hermenn sem risu gegn yfirboðurum sínum og hafa nokkrar af stærstu herstöðvum landsins á sínu valdi hafa heldur ekki krafist afsagnar forsetans eða stjórnar hans.