Athugið þessi frétt er meira en 7 mánaða gömul.

Skipstjóri á Herjólfi sigldi eftir að réttindi runnu út

21.01.2022 - 15:54
Mynd með færslu
 Mynd: Tígull.is - RÚV
Skipstjóri hjá Herjólfi hefur fengið áminningu í starfi og verið lækkaður í tign, eftir að athugasemd og kvörtun barst um óeðlileg vinnubrögð af hans hálfu. Þetta staðfestir Hörður Orri Grettisson, framkvæmdastjóri Herjólfs ohf. við fréttastofu. Lögskráningu skipsins var ábótavant, þar sem skipstjórinn hélt áfram að sigla eftir að atvinnuréttindi hans runnu út fyrir jól.

Eitt af skilyrðum lögskráningar skipa er að skipstjórnarmenn hafi gild atvinnuskírteini.

Lögreglan í Vestmannaeyjum segir enga kæru hafa borist vegna málsins. Upplýsingafulltrúi Samgöngustofu segir engar tilkynningar eða kvartanir hafa borist, einungis fyrirspurnir.

Lögum samkvæmt er óheimilt að leggja skipi úr höfn nema allir skipverjar hafi verið lögskráðir. 

Samkvæmt upplýsingum frá Samgöngustofu var maðurinn lögskráður skipstjóri um borð þegar atvinnuréttindi hans runnu út og var hann áfram lögskráður um borð í nokkra daga eftir að réttindin runnu út. 

 

Skráði aðra sem skipstjóra þegar hann var sjálfur að sigla

Samkvæmt heimildum fréttastofu var aftur á móti beinlínis um ranga skráningu að ræða og skipstjórinn skráði í einhverjum tilvikum nöfn annarra skipstjóra, án þeirra vitundar, þegar hann var sjálfur að sigla.

Stjórn Herjólfs segist í svari við fyrirspurn fréttastofu líta málið alvarlegum augum. Verklag hafi verið endurskoðað af hálfu félagsins til að koma í veg fyrir sambærileg eða svipuð atvik endurtaki sig. 
Skipstjórinn fékk atvinnuskírteinið endurútgefið hjá Samgöngustofu fjórða janúar.

Fréttin var uppfærð eftir athugasemd frá Samgöngustofu. 

alma's picture
Alma Ómarsdóttir
Fréttastofa RÚV