Enska rósin Tahliah Debrett Barnett sem kallar sig FKA Twigs hefur átt forsíður helstu tónlistarmiðla í vikunni þökk sé nýju plötunni hennar Caprisongs. Platan sem inniheldur 17 lög fær lofsamlega dóma og þykir af mörgum vera hennar besta og poppaðasta verk eins og sést á veglegum gestalista sem inniheldur meðal annars Weeknd, Jorja Smith og rapparann Rema.
Raftónlistarmaðurinn og pródúserinn Max Cooper hefur verið starfandi í rúman áratug og tónlist hans þykir minna á Bonobo sem er víst mallandi á mörgum heimagræjum þessa dagana. Max hefur sent frá sér einar sex plötur og endurhljóðblandað hetjur eins og Hot Chip, Christian Löffler og Sasha. Lagið Everything er titillag hans nýju plötu sem er væntanleg í ár.
Enska ljóðskáldið, rithöfundurinn og rapparinn Kae Tempest gaf út fyrsta lagið af væntanlegri plötu sinni The Line Is A Curve fyrir 10 dögum síðan. Lagið er rappað að hætti Tempest en tónlistin er nær tíunda áratugs teknói en hefðbundnum bítum í rappi sem gefur More Pressure ferskan blæ.
Það má segja að skrattinn hitti ömmu sína í endurgerð DJ Shadow af lagi ástralana King Gizzard & The Lizard Wizard - Black Hot Soup. Lagið má segja að sé af gamla skólanum og DJ Shadow skratsar þennan kröftuga dansslagara eins og árið sé 1995.
Tónlistarmaðurinn Curtis Harding kemur frá Michigan og spilar blöndu af blús, sálartónlist, rokki og fönki. Lagið Where's The Love er af plötu hans If Words Were Flowers sem kom út í fyrra og er að klifra sig upp á spilunarlista útvarpsstöðva í heimalandinu og víða um Evrópu þessa dagana.
