Athugið þessi frétt er meira en 6 mánaða gömul.

Söngvakeppninni á RÚV frestað um eina viku

Mynd með færslu
 Mynd: RÚV

Söngvakeppninni á RÚV frestað um eina viku

13.01.2022 - 15:13

Höfundar

Ákveðið hefur verið að fresta öllum viðburðum Söngvakeppninnar 2022 á RÚV um eina viku að höfðu samráði við sóttvarnayfirvöld. Fyrri undanúrslit verða því 26. febrúar og aðalkeppnin fer fram 12. mars.

Forsvarsfólk Söngvakeppninnar vonast eftir því að með frestun aukist líkurnar á að framkvæmd hennar verði eins og best verður á kosið og þar að auki að áhorfendur í sal fái að njóta hennar. „Þetta er auðvitað ekki auðveld ákvörðun, við gerum okkur grein fyrir því að þetta snertir mjög marga, starfsmenn og keppendur,” segir Rúnar Freyr Gíslason framkvæmdastjóri keppninnar. Um 200 manns koma að framkvæmd hennar.

„Við teljum þó til mikils að vinna,“ bætir Rúnar Freyr við. „Með þessu vonumst við eftir að keppnin geti orð með eðlilegum hætti, með áhorfendum í sal. Þessir viðburðir hafa verið mjög vinsælir síðastliðin ár, uppselt á flestar keppnir og það hefur gert mikið fyrir áhorfendur bæði heima og á staðnum. Eins og allir vita er ekki á vísan að róa í þessum málum frekar en öðrum en við vonum það besta. Í þessu ástandi getur auðvitað allt gerst en við stefnum ótrauð áfram og hreinlega ætlum að færa landsmönnum þessa gleðisprengju sem keppnin er.“ Nú unnið hörðum höndum að því að tryggja öryggi jafnt áhorfenda sem keppenda.

„Örvunarbólusetningar fullorðinna og bólusetningar barna eru nú í fullum gangi og hver dagur skiptir máli. Við fylgjum ströngustu kröfum um sóttvarnir á æfingum og upptökum þessa dagana til að minnka áhættuna á smitum og dreifingu þeirra,“ segir Rúnar Freyr.

Svona verður dagskráin:

26. febrúar: Fyrri undanúrslit

5. mars: Seinni undanúrslit

11. mars: Fjölskyldusýning (dómararennsli)

12. mars: Úrslitakvöld

Rúnar Freyr segir að í raun hefði verið ákjósanlegast að fresta keppninni enn frekar til að auka líkurnar á að hægt væri að halda hana án sóttvarnatakmarkana og annarra neikvæðra afleiðinga faraldursins. Það gangi því miður ekki þar sem allra síðasti skilafrestur framlaga í Eurovision sé og verði að vera 13. mars. Sá frestur verði ekki framlengdur.

„Við höfum mætt miklum skilningi hjá því frábæra fólki sem stendur að  keppninni og ekki síður keppendum sjálfum sem eru allir einhuga um að gera hana eins flotta og hægt er. Við erum ótrúlega þakklát fyrir það,“ segir Rúnar Freyr að lokum.

Tíu lög eru í keppninni í ár og er undirbúningur í fullum gangi. Höfundar hafa skilað inn upptökum og æfingar á atriðunum eru hafnar. Lögin, höfundar þeirra og flytjendur verða kynnt í sjónvarpsþættinum Lögin í Söngvakeppninni á RÚV laugardaginn 5. febrúar. Í beinu framhaldi af því verða þau gefin út á helstu tónlistarveitum.

Miðasala á viðburðina verður kynnt og auglýst þegar nær dregur.

 

Tengdar fréttir

Tónlist

Söngvakeppnin haldin í kvikmyndaverinu í Gufunesi