Athugið þessi frétt er meira en 5 mánaða gömul.

Loka Twitter-reikningi bandarískrar þingkonu

02.01.2022 - 18:35
epa09663605 (FILE) - Republican Representative from Georgia Marjorie Taylor Greene responds to a question from the news media during a press conference in the US Capitol in Washington, DC USA, 15 June 2021 (reissued 02 January 2022). Taylor Greene's personal Twitter account was permanently suspended, the short message service said 02 January 2022, following "repeated violations of our COVID-19 misinformation policy." Greene's account had been temporarily suspended before over false claims and company policy violations.  EPA-EFE/SHAWN THEW
 Mynd: EPA
Samskiptamiðillinn Twitter lokaði í dag persónulegum reikningi Marjorie Taylor Greene, þingkonu Repúblikana í fulltrúadeild Bandaríkjaþings. Fyrirtækið hafði áður sett Greene skorður vegna tísta hennar um forsetakosningarnar 2020 og kórónuveirufaraldurinn sem byggðu á ósannindum.

Upplýsingafulltrúi hjá Twitter staðfesti við CNN að reikningi Greene hafi verið lokað varanlega. Ástæðan er endurtekin brot á stefnu fyrirtækisins gegn dreifingu rangra upplýsinga um faraldurinn en Greene hafði brotið fimm sinnum gegn reglunum og uppskar því bann.

Læsa fyrir endurtekin brot

„Við höfum greint frá því með skýrum hætti að við munum læsa reikningum fólks sem gerist sekt um endurtekin brot,“ sagði Katie Rosborough upplýsingafulltrúi í yfirlýsingu.

Tístið sem um ræðir sneri að bólusetningum gegn Covid-19. Á laugardag sagði Greene að fjöldi andláta hafi verið rakinn til bólusetninga og birti villandi graf máli sínu til stuðnings.

Þingkonan getur enn tíst af opinberum aðgangi sínum, @RepMTG, en þeim persónulega, @mtgreene, hefur verið lokað.

Óvinur þjóðarinnar

Greene sakaði miðilinn um þöggun í yfirlýsingu sinni. Þá sagði hún Twitter „óvin bandarísku þjóðarinnar“.

„Samfélagsmiðlar geta ekki stöðvað sannleikann. Tæknirisarnir geta það ekki heldur og hvað þá kommúnistarnir í Demókrataflokknum. Ég stend með sannleikanum og með þjóðinni. Við munum sigra,“ sagði Greene.

Ár frá banni Trumps

Tæpt ár er liðið frá því Twitter læsti reikningi Donalds Trump, þáverandi forseta, eftir áhlaup stuðningsmanna hans á bandaríska þinghúsið.

Greene var fyrst kjörin á þing árið 2020 og byggði kosningabaráttu sína annars vegar á algjörum stuðningi við stefnu Trumps og hins vegar á hugmyndafræði samsæriskenningahreyfingarinnar sem kennir sig við QAnon. Þær kenningar ganga meðal annars út á að frjálslynd elítuklíka reki barnaníðshring sem Trump muni stöðva.

Þórgnýr Einar Albertsson