Mynd: RÚV
Athugið þessi frétt er meira en 8 mánaða gömul.
Varar við hættu á orkuskorti verði ekkert að gert
Hörður Arnarson forstjóri Landsvirkjunar varar við því að orkuskortur kunni að vera yfirvofandi verði ekkert að gert. Efirspurn eftir raforku verði meiri en framboðið sem leiði af sér að fyrirtæki fái ekki þá orku sem þau telja sig þurfa, orkuskipti gangi hægar og raforkuverð hækki meira enn ella væri.
Þetta er meðal þess sem fram kemur í aðsendri grein Harðar sem birtist í Morgunblaðinu í dag.
Hann segir brýnt að teknar verði ákvarðanir um að auka fjárfestingar í innviðum, styrkingu flutningskerfisins og aukinni orkuþörf. Þótt einhugur sé um að vanda beri til verka þurfi líka að taka ákvarðanir.
Greiningar Orkustofnunar og Samorku leiði í ljós aukna þörf fyrir orku í náinni framtíð og því þurfi að tryggja orkuöryggi. Eins segir Hörður brýnt að skýrt sé hverjir beri ábyrgð á að nægileg orka sé í boði fyrir heimili og smærri fyrirtæki, þannig sé það ekki nú.
Hann áréttar einnig að bygging virkjana taki langan tíma, Hvammsvirkjun sem lengst er komin í undirbúningi gæti í fyrsta lagi orðið tilbúin 2026 til 2027.
Hörður bendir á að ekki sé óeðlilegt að sú staða komi upp í núverandi umhverfi að skerða þurfi afhendingu orku til þeirra fyrirtækja sem greiða lágt orkuverð gegn þeim skilyrðum, ef þrengir að í vatnsbúskap Landsvirkjunar. Raforkukerfið sé lokað og að stærstum hluta byggt upp af vatnsafsvirkjunum.
