Athugið þessi frétt er meira en 2 mánaða gömul.

Líst vel á breytingartillögu um embætti sóttvarnalæknis

05.12.2021 - 13:20
Mynd með færslu
 Mynd: Kristinn Þeyr Magnússon - RÚV
Heilbrigðisráðherra líst vel á þær hugmyndir um að sóttvarnalæknir verði framvegis skipaður af ráðherra en ekki Landlækni. Tillögur þessa efnis eru nú til umræðu í samráðsgátt stjórnvalda í tengslum fyrirhugaðar breytingar á sóttvarnalögum.

Tillögurnar byggja meðal annars á álitsgerð sem Páll Hreinsson forseti EFTA dómstólsins gerði að beiðni stjórnvalda í fyrra. Gert er ráð fyrir að frumvarpsdrög verði tilbúin á fyrri hluta næsta árs.

„Þegar við gerðum breytingar í þinginu sem viðbrögð við faraldrinum og tiltölulega hratt og það komi skýrsla frá Páli Hreinssyni sem að kvað upp úr með að við þyrftum að koma með heildarendurskoðun á lögunum,“ segir Willum Þór Þórsson heilbrigðisráðherra.

Í þeim tillögum sem nú eru til umræðu er meðal annars lagt til að fjölskipuð farsóttarnefnd taki að hluta við tillögugerð um opinberar sóttvarnaráðstafanir af sóttvarnalækni. Þá er einnig lagt til að sóttvarnalæknir verði framvegis skipaður af heilbrigðisráðherra en ekki landlækni.

„Já ég held að það geti orðið ágætis fyrirkomulag. Ég held að þetta sé svona stjórnskipulegt atriði út frá ábyrgð og samskiptum. Þannig að ég held að það geti vel orðið góð niðurstaða. En nú er þetta í samráðsgátt og gott að fá fram skoðanir um þetta og svo fer þetta í þingið til umræðu og það verður mjög athyglisvert að sjá þær skoðanir sem koma fram og sjónarmið varðandi þetta,“ segir Willum.

Höskuldur Kári Schram
Fréttastofa RÚV