Athugið þessi frétt er meira en 2 mánaða gömul.

Heil deild í sóttkví vegna omíkron

Mynd með færslu
 Mynd: Elsa María Guðlaugs Drífudót - RÚV
Lyflækningadeild Sjúkrahússins á Akranesi er nú í sóttkví eftir að þar greindist smit af omíkron afbrigði kórónuveirunnar. Eftir að fyrsta smitið af því greindist hér á landi er skimað sérstaklega fyrir því hjá COVID-sjúklingum sem leggjast inn á Landspítala. Ekki hefur bæst við í hóp þeirra sem í gær höfðu greinst með afbrigðið og ekki hafa heldur fleiri lagst inn með það á Landspítala, að sögn Más Kristjánssonar yfirlæknis  smitsjúkdómadeildar Landspítala.

„Við erum með þessi sjö tilfelli sem þegar hefur verið greint frá og það tengist allt þessu upphafstilfelli í kringum heilbrigðisstofnun Vesturlands og Akranes,“ segir Már.

„Eftir að afbrigðið fór að greinast hér á landi var verklagi breytt á spítalanum við greiningu sýna COVID-sjúklinga,“ segir Már.

Breytingin felst í því að nú eru þau sýni tvígreind og sérstaklega leitað að þeim frávikum sem greina omíkron frá öðrum afbrigðum kórónuveirunnar.  

Sá sem fyrst greindist með afbrigðið hér á landi lá á lyflækningadeild Sjúkrahússins á Akranesi þegar hann smitaðist. Þórir Bergmundsson umdæmissóttvarnalæknir á Vesturlandi segir að deildin þar sem hann lá sé nú í sóttkví, en þar liggja nú 12 sjúklingar.

„Það eru engar innlagnir og heldur engar útskriftir. Starfsfólkið sinnir sínum skjólstæðingum í fullum varnarbúningi. Við þurfum að hafa deildina lokaða í að minnsta kosti  2-3 daga. Það fór strax í gang umfangsmikil skimun hjá starfsfólki og sjúklingum þegar þetta tilvik  greindist að kvöldi 30. nóvember Og við erum að endurtaka þá skimun í dag.“

Þórir segir viðbúið að fleiri smit greinist í dag. „Við eigum von á því að veiran hafi þegar dreift sér í samfélaginu.“

 

annalth's picture
Anna Lilja Þórisdóttir