Þorgerður Katrín Gunnarsdóttir, formaður Viðreisnar, segir þjóðina búna að bíða lengi eftir myndun ríkisstjórnar og það vanti skýra sýn og stefnu til að taka þjóðina inn í framtíðina. „Þess vegna verður að segja að það eru ákveðin vonbrigði að sjá að þetta eru mest allt umbúðir. Þetta er skýrasta dæmið um umbúðastjórnmál sem við erum að sjá í dag en minna um innihald,“ segir Þorgerður Katrín.
Athugið þessi frétt er meira en 7 mánaða gömul.
Falleg orð soðin í innihaldslausan graut
Mynd: Þór Ægisson / RÚV
Þó ýmislegt gott sé að finna í stjórnarsáttmála nýrrar ríkisstjórnar eru leiðtogar stjórnarandstöðuflokkanna sammála um að í umbúðunum sé takmarkað innihald. „Þetta er algjörlega viðbúin froða,“ segir Halldóra Mogensen þingmaður Pírata. Logi Einarsson, formaður Samfylkingarinnar, og Inga Sæland, formaður Flokks fólksins, telja bæði að Vinstri græn hafi veikt stöðu sína í ríkisstjórninni.
Mynd: Þór Ægisson / RÚV
Þorgerður Katrín Gunnarsdóttir
Mynd: Þór Ægisson / RÚV
Logi Einarsson
Logi Einarsson segir sorglegt að sjá að hvorki sé minnst á óréttlæti né ójöfnuð í stjórnarsáttmálanum. Honum þykir áhugavert að sjá að réttlæting Vinstri grænna fyrir því að fara í ríkisstjórn með Sjálfstæðisflokki og Framsóknarflokki fyrir fjórum árum, það eru heilbrigðismálin og loftslagsmálin, eru ekki lengur í höndum þeirra. „Þau hverfa þaðan inn í ráðuneyti sjávar og landbúnaðar þar sem þau eru meira og minna sammála íhaldsflokkunum, þannig að þetta hlýtur að veikja stöðu þeirra.“
Mynd: Þór Ægisson / RÚV
Inga Sæland
Það vekur helst athygli Ingu Sæland að hvergi í stjórnarsáttmálanum komi hugtakið fátækt fyrir. „Það kemur hvergi fram raunverulega hvernig á að komast til móts við þá sem standa höllustum fæti í samfélaginu,“ segir Inga. Hún er sammála Loga um að það hafi komið henni á óvart að Vinstri gærn láti sér duga forsætisráðuneytið á meðan þeir yfirgáfu ráðuneyti sinna stærstu áherslumála.
Innihaldslaus málamiðlun
Halldóra Mogensen segir nýja stjórnarsáttmálann viðbúna froðu. „Þegar flokkar ná ekki saman í grundvallar málaflokkum, þá tekur bara dálítinn tíma að kokka upp nógu innihaldslausa málamiðlun,“ segir hún og bætir því við að sáttmálinn boði algjöra uppgjöf í stærstu málunum sem flokkarnir náðu ekki saman um á síðasta kjörtímabili. „Mér sýnist þetta bara vera uppgjöf á því að ná saman um einhver stór mál þannig að ég átta mig ekkert á því hvað þessi ríkisstjórn á að snúast um og maður sér það ekki á þessum stjórnarsáttmála. Þetta eru bara falleg orð sem eru soðin saman í einhvern innihaldslausan graut.“
