Akureyrarbær vill opinbera rannsókn á barnaheimilinu

25.11.2021 - 15:01
Mynd með færslu
 Mynd: Sölvi Andrason - RÚV
Bæjarráð Akureyrarbæjar vill að fram fari ítarleg, opinber rannsókn á rekstri barnaheimilisins á Hjalteyri og aðbúnaði barna sem þar voru vistuð. Bærinn kom ekki að rekstri heimilisins en barnaverndaryfirvöld sveitarfélagsins sendu á sínum tíma börn þangað til lengri eða skemmri dvalar.

Vilja að kannað verði hvers vegna beiðni um félagsmálastjóra var hundsuð

Þetta kemur fram í bókun sem samþykkt var á fundi bæjarráðs Akureyrar í morgun. „Bæjarráð Akureyrarbæjar leggur ríka áherslu á mikilvægi þess að fram fari ítarleg, opinber rannsókn á rekstri barnaheimilisins í Richardshúsi á Hjalteyri á áttunda áratug síðustu aldar og aðbúnaði barna sem þar voru vistuð,“ segir í bókun. 

Bæjarráð Akureyrarbæjar telur brýnt að leitt verði í ljós hið fyrsta hvað fram fór á heimilinu og hvers vegna var látið hjá líða að bregðast við beiðni félagsmálastjóra Akureyrar um skoðun á aðbúnaði barna þar.

Í bókuninni segir einnig að fyrrverandi félagsmálastjóri Akureyrar hafi á sínum tíma óskað formlega eftir því við Barnaverndarráð Íslands að aðbúnaður barna á heimilinu yrði kannaður. „Þeim ábendingum var ekki sinnt sem skyldi og í raun komið í veg fyrir að slík athugun færi fram. Af frásögnum fólks sem dvaldi í barnæsku á heimilinu má hins vegar ljóst vera að grunur félagsmálastjóra Akureyrar um slæman aðbúnað barna í Richardshúsi var á rökum reistur.“