„Ef hún lifir þetta af þá lifir hún af í Hveragerði”

Mynd: Magnús Atli Magnússon / RÚV/Landinn

„Ef hún lifir þetta af þá lifir hún af í Hveragerði”

24.11.2021 - 07:50

Höfundar

Ruth Phoebe Tchana Wandji frá Kamerún stundar doktorsnám við Landbúnaðarháskóla Íslands undir leiðsögn Bjarna Diðriks Sigurðssonar prófessors. Rannsóknarverkefnið byrjaði 2011 í kjölfar þess að Suðurlandsskjálftinn breytti jarðhitakerfum í kringum Hveragerði.

„Þar sem áður var köld náttúra varð jarðvegurinn skyndilega heitur og því aðstæðurnar einstakar. Við finnum jarðhitakerfi víða um heim en vitum sjaldnast hvað þau eru gömul. Núna vitum við nákvæmlega uppá dag hvenær jarðvegurinn byrjaði að hitna, 29. mars 2008. Í kjölfarið buðum við félögum okkar í samstarfsverkni að rannsaka þessar einstöku aðstæður. Skoða hvað gerist í náttúrunni þegar hlýnar hraðar heldur en þær loftlagsbreytingar sem nú eiga sér stað”, segir Bjarni Diðrik. Fræðasvið hans er vistkerfisfræði og hvernig umhverfisþættir hafa áhrif á lífverur.  

„Í kjölfarið settum við á fót þetta verkefni sem í eru um það bil 55 erlendir vísindamenn og 14 háskólar. Það er kallað ForHot. 2019 fengum við styrk frá Evrópusambandinu til þess að nýta þessar einstöku aðstæður til að mennta doktorsnema í umhverfisvísindum. Það verkefni heitir FutureArctic.  Við höfum þegar birt tvær greinar í Nature tímaritinnu. Það er mikil vísindaleg viðurkenning. Það eru ekki svo margar íslenskar rannsóknir sem komast í svo virt rit.” 

Doktorsnemaskólinn fékk tæplega 700 milljóna króna styrk frá Evrópusambandinu og er til fjögurra ára. Doktorsnemarnir 15 eru í námi í 7 Evrópuskum háskólum.

„Við megum ekki ráða íslenska doktorsnema því ekki er ætlast til að þeir skólar sem fá þessa styrki ráði nemendur frá heimalandinu. Ég fékk 16 umsóknir frá úrvals nemendum og þurfti að finna út hverjir þeirra gætu búið hérna við kannski erfiðar íslenskar aðstæður. Þá fann ég  þessa frábæru stúlku sem hafði eytt mörgum vikum úti í skógi í Kamerún auk þess var hún í 6 mánuði í frumskógum í Suður Ameríku við erfiðar aðstæður. Ég sagði að ef hún lifir þetta af þá lifir hún af að vera í Hveragerði.”

Ruth Phoebe Tchana Wandji rannsakar stress í plöntum, hvernig þær bregðast við aðstæðum í náttúrunni  þegar hitinn í jarðveginum hækkar skyndilega. Hennar verkefni snýst um að skoða vaxtarferil plantna og hvernig hann breytist í hlýnandi náttúru, hvernig laufgun á sér stað auk þess sem hún rannsakar líeðlislega ferla. Hún er fædd í Kamerún en fór þaðan til náms í Frakklandi og er ánægði á Íslandi. Hún er hrifin af landinu og ber Íslendingum vel söguna.

Hvernig brugðust foreldrar hennar við þegar hún sagði þeim að hún væri á leið til Íslands?  „Þau voru full efasemdar; ertu viss um að það sé rétti staðurinn fyrir þig. Það er svo kalt er ekki miklu betra að vera í Frakklandi?  „Það eru aðrir staðir í heiminum sem eru erfiðari en Ísland”, segir Ruth Phoebe.  „Ég hef verið dugleg að senda þeim myndir og núna eru þau að ráðgera að heimsækja mig”. Hún er ánægð með allt nema vindinn. „Ég hef ekkert á móti kuldanum en ég er ennþá að reyna að venjast vindinum.”