Athugið þessi frétt er meira en 6 mánaða gömul.

Fiskveiðideila í uppsiglingu milli Dana og Breta

Mynd með færslu
 Mynd: Viðar Kristinsson
Danir saka Breta um brot á fiskveiðiákvæðum samnings um brotthvarf þeirra úr Evrópusambandinu frá í júní. Bretar hafa í hyggju að banna botnvörpuveiðar á verndarsvæði í Norðursjó.

Í samkomulaginu sem gert var á jóladag í fyrra, var gert ráð fyrir að ríki Evrópusambandsins mættu veiða í breskri fiskveiðilögsögu allt til ársins 2026.

Náttúruverndarsinnar fagna áformunum sem þeir vonast til að efli lúðustofninn og viðgang hákarls og skötu í Doggerbanka. Danir hafa veitt þar um aldir og bankinn er einhver gjöfulustu fiskimið þeirra að sögn stjórnvalda.

Rasmus Prehn, sjávarútvegsráðherra Danmerkur, segir í samtali við The Guardian að það valdi miklum usla fyrir danskan sjávarútveg ákveði breska ríkisstjórnin að fara á svig við samkomulagið.

Hann segir slíkt vera algerlega óásættanlegt samningsbrot. Spenna hefur einnig ríkt vegna ágreinings um veiðar franskra fiskibáta í breskri lögsögu í kjölfar brotthvarfs Breta úr Evrópusambandinu.